Vyjava: uiowa.edu
Dziaŭčyna z Francyi naradziłasia ź VIČ i, zdajecca, pieramahła virus, chacia nie prymała leki apošnija 12 hod, piša BBC sa spasyłkaj na dakład navukoŭcaŭ na kanfierencyi Mižnarodnaha tavarystva ŚNID u Vankuviery.
Upieršyniu ŭ historyi navukoŭcy nazirajuć doŭhaterminovuju remisiju ŭ dziciaci biez dapamohi lekaŭ — na siońnia ŭ 18-hadovaj dziaŭčyny virus znachodzicca ŭ kryvi, ale ŭ vielmi nizkaj kancentracyi, i nie raspaŭsiudžvajecca.
Dziaŭčyna atrymała VIČ ad maci. Va ŭzroście troch miesiacaŭ joj pačali davać antyretravirusnyja leki, ale lekavańnie spynili, kali joj było 6 hod.
«Całkam vierahodna, što hetaja dziaŭčyna była ŭ virusałahičnaj remisii tak doŭha, tamu što jana atrymała kambinacyju antyretravirusnych lekaŭ vielmi chutka paśla pačatku infiekcyi», — tłumačyć doktar Aśjer Saes-Siryjon ź Instytuta Pastera ŭ Paryžy (Francyja).
Vypadki «samastojnaj» remisii redkija, ale nie «nievierahodnyja». Dva hady tamu dziaŭčyna ŭ Amierycy, jakaja stała viadomaja jak «Dzicia Misisipi», niby pazbaviłasia ad VIČ. Ale ŭ jaje vypadku remisija praciahnułasia tolki dva hady paśla taho, jak lekavańnie było spynienaje. Viadomaja i hrupa z 14 darosłych čałaviek, «hrupa Viskonci», u jakich nie nazirajecca raźvićcio virusu, za adnym ź ich nazirajuć užo ciaham 13 hod.
Vypadak francužanki dla daktaroŭ značna bolš cikavy: chvoraja ad naradžeńnia, 12 hod bieź lekaŭ. Siońnia jana žyvie narmalnym žyćciom, kažuć daktary. Takoje spałučeńnie faktaŭ zafiksavanaje ŭpieršyniu. Navukoŭcy kažuć ab im jak ab mocnym arhumiencie za samy rańni pačatak antyretravirusnaj terapii i jak ab šturšku da dalejšych daśledavańniaŭ, što mohuć dać u vyniku efiektyŭnyja leki ad VIČ.
