Žanr: drama, mieładrama, detektyŭ
Režysior: Džejk Šrejer
U rolach: Net Vułf, Kara Deleviń, Ościn Abrams, Džaścis Śmit, Chołstan Sejdž, Žaśmin Sabina, Kała Buona, Džozia Sierya
ZŠA, 109 chv.
Adznaka: 7
Kviencin Džejkabsan žyvie pa susiedstvie z Marho Rot Špihielman, siabroŭkaj dziacinstva, ź jakoj jany ciapier mała stasujucca, ale jon usio roŭna zachoŭvaje da jaje ramantyčnyja pačućci.
Adnojčy nočču jana prapanuje jamu ŭziać udzieł u pomście jaje byłomu bojfrendu, i Kju pahadžajecca. Na nastupny dzień Marho nie źjaŭlajecca ŭ škole, i praź niekalki dzion stanovicca jasna, što jana źnikła.
Kju razumieje, što jana pakinuła jamu pasłańni, jakija jon pavinien razhadać, kab znajści dziaŭčynu.
Stužka źniataja pa adnajmiennaj knizie papularnaha amierykanskaha piśmieńnika Džona Hryna. Letaś vyjšaŭ film pa jaho knizie «Vinavatyja zorki», nad novaj ekranizacyjaj pracavała taja ž kamanda. Hałoŭnuju rolu vykanaŭ amierykaniec Net Vułf, jaki źjaviŭsia ŭ roli druhoha płana ŭ papiaredniaj ekranizacyi. Taksama Net paŭdzielničaŭ u stvareńni saŭndtreka dla stužki.
Rola Marho dastałasia brytanskaj madeli i akciorcy Kary Deleviń. «Kali ja pracuju nad rollu, ja prydumlaju historyju piersanaža. Chto jana i adkul, što joj padabajecca, čym jana zajmajecca, pra što dumaje, jakim mahło b być jaje dziacinstva. Usio, čaho niama ŭ knizie, jość u maim ujaŭleńni. Ja stvaraju biblijateku historyj, jakija mahli b zdarycca z Marho i jaje asiarodździem, kab vykarystoŭvać adčuvańni ad hetych historyj, nabyty ŭ ich dośvied, kali jon patrabujecca ŭ kantekście sceny», — raskazała Kara pra svaju pracu.
Choć padziei knihi adbyvajucca ŭ Arłanda (štat Fłaryda), z-za zanižanych padatkaŭ zdymki prachodzili ŭ niekalkich miastečkach Paŭnočnaj Karaliny. Niekatoryja padziei knihi źmienienyja dziela kiniematahrafičnaści, ale sutnaść tvora pakinutaja niaźmiennaj.
«Papiarovyja harady» — kropki, jakija isnujuć tolki na mapach, ich stavili kartohrafy dla abarony aŭtarskich pravoŭ.
Marho nie choča mirycca z sumnaj paŭsiadzionnaściu i spłanavanaj budučyniaj, nie choča być niesapraŭdnaj papiarovaj dziaŭčynkaj i adpraŭlajecca ŭ padarožža, kab znajści svoj asabisty šlach da sapraŭdnaha žyćcia i ščaścia.
Niekatoryja niuansy knihi zhublenyja, ale stužka zachavała pazityŭny nastroj i miakkaść, ź jakimi aŭtar apaviadaje pra niaprosty čas u žyćci kožnaha čałavieka.
