U adkaz na artykuł Źmitra Pankaŭca pra dušeŭny adpačynak u Partuhalii pryjšoŭ cikavy kamientar z zaŭvahami ad karystalnika pad nikam «Hleb z Ałharve». Voś što jon piša:
«1. Ukraincaŭ tut viedajuć ci nie lepiej jak rasiejcaŭ (nu, chiba tolki kali pa darahich restaracyjach chadzić, tam bolš viedajuć mienavita rasiejcaŭ. Pa peŭnych padlikach (niama dakładnych kryteryjaŭ, tamu nielha kazać napeŭna), ukraincaŭ tut kala 100 000 (heta nasielnictva Brahi ci Salihorska). A ŭsich vychadcaŭ z byłoha SSSR tut nazyvajuć Os Lestes («uschodniki»). Zrešty, tut usie jeŭrapiejcy — uschodniki.
2. Vielmi raju naviedać mys Saŭ Vinsent, jaki tut nazyvajuć «kraj śvietu», Hetaje miesca mienš raskručanaje jak Kabu da Roka, ale heta sapraŭdy miesca, jakoje rymlanie ŭvažali za kaniec tahačasnaha viadomaha śvietu.
3. Akijan tut sapraŭdy nie taki ciopły, jak Mižziemnaje mora. Ale ŭ nas u Ałharve kupajucca ad krasavika ažno da kanca listapada, Tak što zavitajcie da nas u Ałbufiejru.
Ałharve, fota lonelyplanet.com
4. Moj 16-hadovy syn adnojčy, pabłukaŭšy pa partuhalskich vułačkach, skazaŭ, što, u adroźnieńnie ad navat Varšavy dy Vilni, tut nie adčuvajecca «savok».
5. Niahledziačy na prakamunistyčnyja simvały, Partuhalija značna bolš «pravaja» kraina, čym, naprykład, Francyja ci navat Niamieččyna. Učora akurat vybrali prezidentam pradstaŭnika pravych sił. Što cikava, było 10 kandydataŭ (zhadajma 2010 ŭ Biełarusi), nikoha nie aryštavali, a premjer-ministr, pradstaŭnik levaj Sacyjalistyčnaj partyi Antoniu Košta skazaŭ: «Ad siońnia Marsełu Rebełu die Soŭza — moj prezident». Jeŭrapiejskaść i kultura;-)
6. Darečy, pravaja partyja, jakaja da kastryčnika 2015 była kirujučaj, nazyvajecca Sacyjał-demakratyčnaja partyja, Voś takija pravyja sacyjał-demakraty.
7. Cikavy byŭ kamientar pra adnosiny hišpancaŭ i partuhalcaŭ. Lepš paraŭnać hetyja dva narody nie z rasiejcami i biełarusami, a z rasiejcami i ŭkraincami. Partuhalija była niejki čas u składzie Hišpanii, ale vyrvałasia z «braterskich abdymkaŭ», za što hišpancy pierarezali partuhałam vychad na reštu Jeŭropy pa sušy. Heta vymusiła partuhałaŭ daśledavać marskija šlachi. Partuhały nazyvajuć hišpańskuju movu «kłoŭnskaj partuhalskaj», a hišpany — Partuhaliju «hetaj kałonijaj». Tym nie mienš, hišpany pryjazdžajuć z svajoj Hišpanii, dzie svoj akijan i mora, mienavita ŭ Partuhaliju, nie tolki tamu, što tut tańniej, ale tut i ježa bolš jakasnaja.
Zavitajcie da nas. Bem-vindo!»
