22 vieraśnia ŭ miežach Reeperbahn Festival – hałoŭnym u Niamieččynie mižnarodnym źjeździe prafiesijanałaŭ u halinie sučasnaj muzyki – upieršyniu buduć pradstaŭlenyja biełaruskija artysty. Mierapryjemstva adbyvajecca ŭ Hamburhu ŭ rajonie znakamitaj vulicy Reeperbahn, dzie kaliści hrali svaje pieršyja kancerty jašče nikomu nieviadomyja The Beatles.
Reeperbahn Festival źjaŭlajecca adnym z troch najbujniejšych šoŭkiejs-fiestyvalaŭ Jeŭropy i dobra viadomy na suśvietnym uzroŭni. Kožny hod jon ciaham čatyroch dzion adbyvajecca na 70 kłubnych i adkrytych placoŭkach u Hamburhu, u im biaruć udzieł kala 400 artystaŭ. Vystupy muzykaŭ hladziać kala 30 tysiač hledačoŭ i bolš za 3,5 tysiačy prafiesijanałaŭ z usiaho śvietu. Heta ažna z hałoŭnych placovak dla prasoŭvańnia kalektyvaŭ z roznych krain na mižnarodny rynak i prosta vialikaje śviata muzyki i dobraha nastroju.
Vysoki status fiestyvalu abumoŭlivaje i padychod da adboru artystaŭ: da razhladu prymajucca tolki tyja, chto ŭžo maje dośvied vystupaŭ na jeŭrapiejskich šoŭkiejs-fiestyvalach. Z poŭnaha śpisa biełaruskich udzielnikaŭ padobnych mierapryjemstvaŭ apošnich hadoŭ arhanizatary abrali 5 imionaŭ: Super Besse (post-pank), Mustelide (indzi-pop), Teleport (indzi-rok), Deech (elektronika) i Alexei De Bronhe (elektronika).
Biełaruskija artysty vystupiać u miežach admysłovaha biełaruskaha kancertnaha šoŭkiejsa, partnioram jakoha staŭ Instytut imia Hiote ŭ Minsku – ciaham apošnich troch hod hetaja ŭstanova ŭ miežach prajekta «Minskaja akademija papularnaja muzyki» pravodziła ŭ Biełarusi biaspłatnyja sieminary z udziełam pradstaŭnikoŭ niamieckich łejbłaŭ i fiestyvalaŭ, menedžeraŭ artystaŭ i pradstaŭnikoŭ ŚMI. Padtrymku šoŭkiejsa zabiaśpiečvaje sajt Experty.by, jaki pradstaŭlaje ŭ Biełarusi šoŭkiejs-fiestyvali Tallinn Music Week (Estonija), MENT Ljubljana (Słavienija), What's Next In Music? / Vilnius Music Week (Litva), Lost In Music (Finlandyja).
– Dla nas heta adzin ź pikavych momantaŭ i važnych vynikaŭ prahramy «Minskaja akademija papularnaj muzyki», jakaja maje skončycca ŭ hetym hodzie. Na lekcyjach i ŭ pryvatnych razmovach usie niamieckija śpikiery kazali pratoje, što biełaruskaja muzyka ničym nie horš za budź jakuju inšuju. Što jana pavinna być pradstaŭlena na mižnarodnaj scenie, kab atrymać novy dośvied i impuls dla raźvićcia. Tamu my vielmi radyja, što hetyja słovy i stvoranyja suviazi nie zastalisia na ŭzroŭni teoryi, a znajšli praktyčny praciah, – kaža Frank Baŭman, dyrektar Instytuta imia Hiote ŭ Minsku.
– Udzieł biełaruskich artystaŭ u Reeperbahn Festival – heta vychad na absalutna novy ŭzrovień mahčymaściaŭ i mižnarodny znak jakaści dla ŭsioj biełaruskaj muzyčnaj sceny. Heta nie nie značyć, što ŭžo ŭvosień niechta ź biełaruskich artystaŭ abaviazkova padviša kantrakt ŭ bujnym zachodnim łejbłam, ale vierahodnaść takoj padziei ŭ budučyni absalutna dakładna padvyšajecca, – adznačaje Źmicier Biezkaravajny, kiraŭnik prajekta Experty.by.
Da 1 žniŭnia biełaruskija muzyki mohuć padać zajaŭku na vystup u miežach šoŭkiejs-fiestyvalu What's Next In Music? u stalicy Litvy (2-3 vieraśnia 2016). Da 5 vieraśnia adčynieny pryjom zajavak na fiestyval MENT Ljubljana ŭ stalicy Słavienii (1-3 lutaha 2017). Padrabiaznaja infarmacyja pra ŭmovy na sajcie Experty.by.
