Ministr zamiežnych spraŭ Niamieččyny Frank-Valter Štajnmajer skazaŭ u paniadziełak, što vykazvańni novaabranaha prezidenta ZŠA Donalda Trampa pra sastarełaść NATA vyklikała zaniepakojenaść krain aljansu.
U NATA ŭvachodzić 28 dziaržaŭ.
Štajnmajer adkamientavaŭ słovy Trampa ŭ Bruseli, paśla sustrečy z hienieralnym sakratarom NATA Jensam Stołtenbierham. Štajnmajer adznačyŭ, što vykazvańni Trampa iduć urazrez sa słovami budučaha ministra abarony ZŠA Džejmsa Metysa. Štajnmajer taksama ŭžyŭ słova «zdumleńnie».
«Ja razmaŭlaŭ siońnia ź ministrami zamiežnych spraŭ nie tolki krain ES, ale i krain NATA, i ja mahu skazać, što jość sihnały, što napružanaść nie źniziłasia», — adznačyŭ Štajnmajer.
Tramp pryniasie prezidenckuju prysiahu ŭ piatnicu.
U svaim intervju Tramp skazaŭ, što NATA sastareŭ, bo aljans nie abaraniŭ ad terarystyčnych atak. Jon taksama čarhovy raz abrynuŭsia na krainy NATA, što jany traciać na abaronu mienš za 2% ad VUP.
Tramp taksama skazaŭ, što jon zaŭždy «vielmi pavažaŭ» kanclerku Niamieččyny Anhieły Mierkiel, ale raskrytykavaŭ jaje rašeńnie 2015 hoda dać miljonu mihrantaŭ prytułak u Niamieččynie jak «katastrafičnuju pamyłku», što ŭmahčymiła terakty.
Adychodziačy dziaržsakratar ZŠA Džon Kiery skazaŭ, što Trampu «niedarečna» ŭpłyvać na palityčny praces u inšych krainach svaimi zajavami.
Pres-sakratar Kramla Piaskoŭ, u svaju čarhu, pahadziŭsia sa słovami Trampa, što NATA sastareŭ.
Kaardynatar transatłantyčnych adnosin z boku Hiermanii Jurhien Hardt skazaŭ ahienctvu Rojterz, što, na jahonuju dumku, Kanhres ZŠA nie dazvolić, kab Amieryka admoviłasia ad roli lidara NATA.
Kiraŭnik kamiteta pa zamiežnych spravach bundestaha Norbiert Rethien skazaŭ, što Niamieččyna budzie zmahacca za zachavańnie adzinstva Zachadu.
«Jeŭropa nie zdolnaja ŭziać na siabie rolu, jakuju ŭ padtrymańni biaśpieki vykonvali Złučanyja Štaty. Tamu na kanu lažyć šmat — samyja asnovy ładu svabodnaha śvietu i jeŭrapiejskaj biaśpieki. I za heta nam treba zmahacca, heta naš ekzistencyjny intares», — skazaŭ Rethien.
