Jaki sami i dazvolili ŭstalavać. Rajonny sud uziaŭ bok śviatara.
U kastryčniku 2008 h. probašč parafii Najśviaciejšaha Serca Jezusa i Maci Božaj Facimskaj ksiondz Vital Myšona atrymaŭ dazvoł na ŭstalavańnie katalickaha kryža na ŭjeździe ŭ Lelčycy (Homielskaja vobłaść).
«My dabivalisia hetaha kala piaci hadoŭ, ale biezvynikova» — kaža a. Vital. Potym rajvykankam uznačaliŭ Viktar Hamołka, jaki daŭ taki dazvoł. Pavodle pradpisańnia rajvykankamu, ustalavańnie kryža było ŭzhodnienaje ŭ DAI i DSU, a na imia staršyni była napisanaja adpaviednaja zajava. Atrymaŭšy stanoŭčy adkaz, parafijanie ŭstalavali i aśviacili kryž u honar śviatoha Kanstancina, jaki, pavodle padańnia, u 313 hodzie pierad rašučaj bitvaj pabačyŭ u niebie kryž. Kanstancin pieramoh i zrabiŭ chryścijanstva dziaržaŭnaj relihijaj Rymskaj impieryi. Na lelčyckim kryžy jość cytata łacinaj z taho padańnia — «In hoc signo vinces» («U hetym znaku ty pieramožaš»).
Nieŭzabavie lelčyckaha ksiandza vyklikali ŭ rajvykankam, dzie paviedamili, što pracedura ŭstalavańnia patrabavała taksama ŭzhadnieńnia z rajonnym architektaram.Parafii było zroblenaje pradpisańnie zrabić prajekt, uzhadnić jaho z architektaram i ziamielnymi słužbami. «Parafijanie ŭžo pačali rychtavać nieabchodnyja dakumienty, ale tut rajonny architektar zajaviŭ, što składaje na mianie pratakoł za toje, što ja nie ŭzhadniŭ ź im hetaje pytańnie», — pryhadvaje a. Vital.
Potym byŭ sud, jaki, adnak, pryznaŭ, što ksiondz i parafijanie nie vyjšli ŭ svaich dziejańniach za ramki patrabavańniaŭ rajvykankamu i takim čynam zakon nie parušyli. Sud pastanaviŭ spravu spynić. Ale heta nie spyniła čynoŭnikaŭ — architektar skłaŭ čarhovy akt, a načalnik ziemlebudaŭničaj i hieadezičnaj słužby Lelčyckaha rajonu abvinavaciŭ ksiandza ŭ samavolnym zachopie ziamielnaha ŭčastka. Kaściołu pradpisali da 30 studzienia ziamlu vyzvalić, albo aformić jaje adpaviednym čynam. «Sami my kryž pieranosić nie budziem», — zajaviŭ ksiondz.
Pa jaho słovach, apošnim časam namieśnica staršyni rajvykankamu Volha Haŭryłaviec, jakaja źjaŭlajecca taksama staršynioj kamisii pa praviercy zakanadaŭstva ŭ halinie svabody sumleńnia, stała nastojvać na svajoj prysutnaści na zaniatkach niadzielnaj škołki. Ksiondz, paličyŭšy heta ŭmiašańniem va ŭnutranaje žyćcio parafii, admoviŭ. I atrymaŭ papiaredžańnie ad abłvykankamu za pieraškodu pracy supracoŭnikaŭ rajvykankamu.
Namieśnica staršyni rajvykankamu Volha Haŭryłaviec prakamientavać situacyju admoviłasia:
«Vakoł hetaha kryža šmat samaj roznaj i nadumanaj infarmacyi».
* * *
Parafija ŭ Lelčycach adradziłasia ŭ 1990 hodzie, siońnia jana składaje kala 350 čałaviek. Stary draŭlany kaścioł zhareŭ u 1943 h. U 1998 h. pad kiraŭnictvam probašča ksiandza Źbihnieva Bojara byŭ zbudavany novy kaścioł, jaki atrymaŭ tytuł Najśviaciejšaha Serca Jezusa i Maci Božaj Facimskaj.
