Učora ŭviečary ŭ Miensku kala 21 hadziny ŭ kaviarni Małoj sceny teatru Janki Kupały supracoŭnikami pravaachoŭnych orhanaŭ byŭ zatrymany apazycyjny palityk Viačasłaŭ Siŭčyk. Supracoŭniki pałka asablivaha pryznačeńnia zajšli ŭ kaviarniu nibyta dla pravierki dakumentaŭ. U Siŭčyka nie było z saboj pašparta, i jaho, chutčej za ŭsio, advieźli ŭ Centralny RAUS pad markaj vyznačeńnia asoby.
Nahadajem, što ŭ časie sakavickich padziej na Kastryčnickaj płoščy V.Siŭčyk byŭ adnym z natchnialnikaŭ namiotavaha miastečka. Tady pravaachoŭnym orhanam z dapamohaj padmanu ŭdałosia vymusić Siŭčyka pakinuć płošču. U vyniku jaho źbili, i jon trapiŭ u bolnicu. Tady sama ŭ palityka zabrali pašpart.
Paśla vypiski z bolnicy Siŭčyku ŭdałosia uniknuć zatrymańnia. Jon byŭ zavočna prysudžany da administratyŭnaha aryštu.
Kali palityka zaraz adpraviać adbyvać administratyŭnaje pakarańnie, to heta budzie parušeńniem dziejnaha zakanadaŭstva, bo ŭ vypadku administratyŭnaha pravaparušeńnia pakarańnie musić być prymienienaje nie paźniej za dva miesiacy z momantu vyjaŭleńnia parušeńnia. A ŭ vypadku ź Siŭčykam dvuchmiesiačny termin užo daŭno skončyŭsia.
❏
Fota photo.bymedia.net
