Ź lidaraŭ u bankruty pieratvaryłasia firma-imparcior budaŭničych materyjałaŭ.
Firma, jakoj kiruje Alaksandr, pačała imkliva raźvivacca ŭ žniŭni 2010 hoda. Jana zajmajecca impartam budmateryjałaŭ. Ale ciapier pra heta možna ź vialikaj dolaj vierahodnaści kazać u minułym časie. Kali praz try tydni situacyja nie źmienicca da lepšaha, zasnavalniki likvidujuć kampaniju i vyviezuć kapitał. I navat niahledziačy na heta Alaksandr prosić nie nazyvać jahonaje proźvišča i nazvu firmy.
Biznes-partniory Alaksandra pradkazvali valutny kryzis jašče pry kancy minułaha hoda. Bolšaść była ŭpeŭnienaja, što devalvacyja adbudziecca na miažy zimy-viasny 2011-ha.Kali Nacbank pavialičyŭ termin reziervavańnia srodkaŭ na kuplu valuty da 30 dzion, mnohija imparciory, kampanija Alaksandra ŭ tym liku, nie ryzyknuli hulać pa novych praviłach. Praŭda, niejki čas firma jašče vykarystoŭvała lehalnyja, ale składanyja schiemy nabyćcia dalaraŭ pa kursie 3200—3500 rubloŭ za dalar.
Da prablem z valutaj dadalisia inšyja momanty. Dziaržaŭny mytny kamitet 24 lutaha vydaŭ zahad №63-OD. Zhodna z zahadam, byli ŭviedzienyja indykatyvy na śpis impartnych tavaraŭ, vyrablenych pa-za Mytnym sajuzam. Što zrabiła myty na takija tavary značna vyšejšymi (časam u 50 razoŭ). Akramia taho, uviadzieńnie indykatyvaŭ zrabiła pamiery mytaŭ niepradkazalnymi: imparciory pačali zavozić tavary «ŭślapuju», nie viedajučy, jakoj budzie pošlina.
Ciapier na valutnaj biržy možna kupić dalary, ale pa takoj canie impart hublaje sens. Kab vyžyć, firma pradaje na ekspart biełaruskija tavary — aŭtazapčastki i navat miasa.Bolš za pałovu piersanału vypravili ŭ biaspłatny adpačynak, rešcie ŭrezali zarobak. Nad pradpryjemstvam navisła pahroza bankructva. «U lubym razie, kali my i vystaim, to spatrebicca hod-dva, kab akupić straty ad hetaha kryzisu».
