Alena Kavalenka: Stan Siarhieja «vielmi ciažki» 10

Stan viciebskaha aktyvista Kansiervatyŭna-chryścijanskaj partyi — BNF Siarhieja Kavalenki, jaki trymaje haładoŭku, «vielmi ciažki», śćviardžaje jaho žonka Alena Kavalenka.

Pavodle jaje słoŭ, 5 krasavika jana zmahła sustrecca z mužam u kałonii «Vićba-3».

«Siarhiej vyhladaje vielmi kiepska. Jaho prymusova vyvodziać z haładoŭki, i stan u jaho vielmi ciažki. Jamu pa-raniejšamu staviać kropielnicy ź vitaminami, aminakisłotami i fizrastvoram. Navat na sustreču jon pryjšoŭ ź niejkimi kropielnicami ŭ nosie», — adznačyła Alena Kavalenka.

Jak paviedamiŭ žoncy Kavalenka, jamu praz zond uvodziać kašy i bulbianoje piure. «Pa pieršym časie pry prymusovym karmleńni jon znachodziŭsia ŭ paŭnieprytomnym stanie. Adzin raz zhubiŭ prytomnaść i ačuniaŭ pryviazanym da łožku. Potym jon byŭ pryviazany try dni i try nočy. Jaho navat nie vypuskali ŭ prybiralniu. Akramia taho, Siarhiej prastyŭ, u jaho pastajanny kašal z kryvioj, što śviedčyć ab adkrytaj jaźvie straŭnika», — skazała Alena Kavalenka.

Jana taksama zajaviła, što ŭ Siarhieja praktyčna nie pracujuć nyrki, piečań i padstraŭnikavaja załoza.

«U takim stanie nie puskać jaho ŭ prybiralniu, kab vyvieści pradukty razłažeńnia z arhanizma, — heta śviadomaje zabojstva», — ličyć Alena Kavalenka.

Pry hetym jana skazała, što aktyvista pa-raniejšamu admaŭlajucca pieravodzić u cyvilnuju balnicu. «Šansaŭ na vyratavańnie Siarhieja ciapier mała jak nikoli», — adznačyła Alena Kavalenka.

***

Nahadajem, Siarhiej Kavalenka znachodzicca ŭ psichijatryčnym adździaleńni balnicy na terytoryi papraŭčaj kałonii «Vićba-3». 2 krasavika stała viadoma, što jaho prymusova kormiać praz zond. Pavodle słoŭ žonki apazicyjaniera, prymusovaje karmleńnie pačałosia 1 krasavika. Da šaści razoŭ u dzień Kavalenku ŭlivajuć dziciačuju małočnuju sumieś «Biełłakt», a taksama praciahvajuć stavić kropielnicy z hlukozaj, aminakisłotami i vitaminami. U chodzie haładoŭki aktyvist apazicyi, jaki raniej važyŭ kala 83 kiłahramaŭ, straciŭ bolš za pałovu svajoj vahi. Ciapier jon važyć kala 45 kiłahramaŭ.

Razhlad kasacyjnaj skarhi Siarhieja Kavalenki pryznačany na 10 krasavika ŭ Viciebskim abłasnym sudzie.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH