20 лістапада ў Менску прайшла прэзэнтацыя першага беларускамоўнага альбому гурту «J:морс» «Адлегласьць».
У дыск увайшло 11 песень, сярод якіх — тры песні па-беларуску з папярэдніх альбомаў («Жывi», «Так‑цi‑так», «Паветра»), два пераклады кампазіцый з рускай мовы («Маё сонца», «Глядзi») і шэсць новых запісаў. Аўтары ўсіх кампазіцый, акрамя адной народнай песні «Вярба», — удзельнікі гурту Уладзімір Пугач і Раман Арлоў.
Як паведаміў на прэс‑канферэнцыі лідэр гурту Уладзімір Пугач, ідэя запісаць беларускамоўны альбом з’явілася ў калектыву тры гады таму, пасля зваротаў наконт гэтага гледачоў на канцэртах. Паводле яго слоў, у аснове гэтага альбома «ляжыць такая ж патрэба ў самарэалізацыі, як і ў выпадку з астатнімі альбомамі». У той жа час ён заўважыў, што адзін з матываў выпуску такога дыска — «даказаць сабе і іншым, што беларускамоўная музыка таксама можа быць папулярнай» і «павінна гучаць на радыё». Паводле слоў У.Пугача, неабходна разбурыць «дыхатамію, калі мэйнстрымавыя выканаўцы спяваюць у асноўным на рускай, а альтэрнатыўныя — на беларускай мове».
На выпушчаным дыску «J:морс» прадстаўлены таксама новы праект калектыву — фільм «Адлегласць: Падарожжа па Беларусi». Праект уяўляе сабой 15‑хвілінную відэазамалёўку аб помніках беларускай архітэктуры, размешчаных у розных месцах Беларусі пераважна непадалёк ад мяжы. Фільм зняты ўдзельнікамі гурту на звычайны 10‑мегапіксельны лічбавы апарат і змантаваны не з відэаматэрыялаў, а больш чым з 20 тыс. фотаздымкаў з выкарыстаннем тэхналогіі «time laps». Тэхнічную частку праекта рэалізаваў беларускі медыямастак Андрэй Савіцкі.
«Усе ведаюць Мір, Нясвіж, Хатынь — і ўсё. А ў Беларусі каля тысячы помнікаў архітэктуры, якімі можна любавацца», — заўважыў У.Пугач. Паводле слоў А.Савіцкага, матэрыял, з якога створаны фільм, які мае фармат выставачнай экспазіцыі. «Мы былі б рады, калі б праект стаў асновай выставы ў краязнаўчым музеі», — сказаў ён.
Канцэртная прэзентацыя новага альбома «J:морс» і фільма, знятага калектывам, пройдзе ў Мінску 2 снежня.
Каментары