Чайчыц: Крыўдзіцца — гэта не па-хрысціянску

Я сам благі хрысьціянін, але, назіраючы за крытыкай на адрас расстраляных тэрарыстамі карыкатурыстаў Charlie Hebdo з хрысьціянскага царкоўнага і каляцаркоўнага боку, — маўляў, нельга было правакаваць і нельга было абражаць веру — скажу вось што.

Калі тваёй веры можна нанесьці шкоду якісь дурацкі малюнак — значыць, твая вера нічога ня вартая.

Задамося пытаньнем амэрыканскіх пратэстантаў: What would Jesus do? Калі Ісуса ўкрыжоўвалі (а ня проста малявалі пра яго крыўдную карцінку ў часопісе), ён сказаў наступнае: «Ойча, прабач ім, бо ня ведаюць, што робяць» (Лк. 23:34).

І пагатоў Нагорную пропаведзь наконт Charlie Hebdo можна цытаваць яшчэ долей (Лк 6:27-38):

«27 любіце ворагаў вашых, дабро рабіце тым, хто вас ненавідзіць.

28 Бласлаўляйце тых, хто вас праклінае, маліцеся за тых, хто вас крыўдзіць.

29 Таму, хто ўдарыў цябе па шчацэ, падстаў і другую; і таму, хто адбірае ў цябе плашч, не забараняй узяць і кашулю.

30 Кожнаму, хто просіць у цябе, давай, і ад таго, хто ўзяў тваё, не дамагайся звароту.

31 І як хочаце, каб рабілі вам людзі, так вы ім рабіце.

32 Калі любіце тых, хто любіць вас, якая вам за гэта падзяка? Бо грэшнікі таксама любяць тых, хто іх любіць.

33 І калі чыніце дабро тым, хто вам чыніць дабро, якая вам за тое падзяка? І грэшнікі робяць тое самае.

34 І калі пазычаеце тым, ад каго спадзяецеся атрымаць назад, якая вам за тое падзяка? Бо і грэшнікі пазычаюць грэшнікам, каб атрымаць столькі ж.

35 Але вы любіце ворагаў вашых, і рабіце дабро, і пазычайце, не чакаючы нічога ўзамен, і будзе ўзнагарода вашая ў небе вялікая, і будзеце сынамі Найвышэйшага, бо Ён ласкавы да няўдзячных і да злых».

Для мяне найважнейшая хрысьціянская каштоўнасьць — гэта недасяжнае для шараговага чалавека ўменьне цярпець і трываць зьнявагу з боку злодзея, адказваць прабачэньнем і любоўю на нянавісьць і гэтым атрымліваць калясальную маральную перамогу над непрыяцелем. У гэтым сапраўдная духоўная сіла хрысьціянства і хрысьціяніна.

Яшчэ раз: Ісус дэманстраваў гэтыя якасьці на ўласным жахлівым пакутлівым пакараньні, а тут — якіясь малюнкі на паперы ці ў інтэрнэце. Малюнкі!

Эўрапейская талерантнасьць — яна, як вы думаеце, адкуль? Менавіта ад стагодзьдзяў хрысьціянскага гартаваньня Эўропы.

Разважаць пра «самі вінаваты», «ня трэба было правакаваць» і гэтым ускосна апраўдваць тэрарыстычны акт — у гэтым, мне здаецца, вельмі мала хрысьціянскага.

Таксама ў гэтым кантэксьце красамоўна, калі афіцыйны прадстаўнік РПЦ крытыкуе фільм «Левіятан» за тое, што там у несымпатычным вобразе прадстаўленае ўзаемадзеяньне РПЦ і карумпаванага расейскага чынавецтва. Больш за тое, называе такую крытыку «грахом». Але годзе тут і гаварыць.

• 0
• 0
• 0
• 0
• 0
• 0