Čajčyc: Kryŭdzicca — heta nie pa-chryścijansku

Ja sam błahi chryścijanin, ale, nazirajučy za krytykaj na adras rasstralanych terarystami karykaturystaŭ Charlie Hebdo z chryścijanskaha carkoŭnaha i kalacarkoŭnaha boku, — maŭlaŭ, nielha było pravakavać i nielha było abražać vieru — skažu voś što.

Kali tvajoj viery možna nanieści škodu jakiś duracki malunak — značyć, tvaja viera ničoha nia vartaja.

Zadamosia pytańniem amerykanskich pratestantaŭ: What would Jesus do? Kali Isusa ŭkryžoŭvali (a nia prosta malavali pra jaho kryŭdnuju karcinku ŭ časopisie), jon skazaŭ nastupnaje: «Ojča, prabač im, bo nia viedajuć, što robiać» (Łk. 23:34).

I pahatoŭ Nahornuju propaviedź nakont Charlie Hebdo možna cytavać jašče dolej (Łk 6:27-38):

«27 lubicie vorahaŭ vašych, dabro rabicie tym, chto vas nienavidzić.

28 Błasłaŭlajcie tych, chto vas praklinaje, maliciesia za tych, chto vas kryŭdzić.

29 Tamu, chto ŭdaryŭ ciabie pa ščace, padstaŭ i druhuju; i tamu, chto adbiraje ŭ ciabie płašč, nie zabaraniaj uziać i kašulu.

30 Kožnamu, chto prosić u ciabie, davaj, i ad taho, chto ŭziaŭ tvajo, nie damahajsia zvarotu.

31 I jak chočacie, kab rabili vam ludzi, tak vy im rabicie.

32 Kali lubicie tych, chto lubić vas, jakaja vam za heta padziaka? Bo hrešniki taksama lubiać tych, chto ich lubić.

33 I kali čynicie dabro tym, chto vam čynić dabro, jakaja vam za toje padziaka? I hrešniki robiać toje samaje.

34 I kali pazyčajecie tym, ad kaho spadziajeciesia atrymać nazad, jakaja vam za toje padziaka? Bo i hrešniki pazyčajuć hrešnikam, kab atrymać stolki ž.

35 Ale vy lubicie vorahaŭ vašych, i rabicie dabro, i pazyčajcie, nie čakajučy ničoha ŭzamien, i budzie ŭznaharoda vašaja ŭ niebie vialikaja, i budziecie synami Najvyšejšaha, bo Jon łaskavy da niaŭdziačnych i da złych».

Dla mianie najvažniejšaja chryścijanskaja kaštoŭnaść — heta niedasiažnaje dla šarahovaha čałavieka ŭmieńnie ciarpieć i tryvać źniavahu z boku złodzieja, adkazvać prabačeńniem i luboŭju na nianaviść i hetym atrymlivać kalasalnuju maralnuju pieramohu nad niepryjacielem. U hetym sapraŭdnaja duchoŭnaja siła chryścijanstva i chryścijanina.

Jašče raz: Isus demanstravaŭ hetyja jakaści na ŭłasnym žachlivym pakutlivym pakarańni, a tut — jakijaś malunki na papiery ci ŭ internecie. Malunki!

Eŭrapiejskaja talerantnaść — jana, jak vy dumajecie, adkul? Mienavita ad stahodździaŭ chryścijanskaha hartavańnia Eŭropy.

Razvažać pra «sami vinavaty», «nia treba było pravakavać» i hetym uskosna apraŭdvać terarystyčny akt — u hetym, mnie zdajecca, vielmi mała chryścijanskaha.

Taksama ŭ hetym kantekście krasamoŭna, kali aficyjny pradstaŭnik RPC krytykuje film «Levijatan» za toje, što tam u niesympatyčnym vobrazie pradstaŭlenaje ŭzajemadziejańnie RPC i karumpavanaha rasiejskaha čynaviectva. Bolš za toje, nazyvaje takuju krytyku «hrachom». Ale hodzie tut i havaryć.

• 0
• 0
• 0
• 0
• 0
• 0