«Вярніце арматуру»: колькі дзяржаве каштавала справа патрыётаў? 

Ціхімі словамі Наскевіча пра «пастаўленую кропку» скончылася гучная Справа патрыётаў: восем месяцаў следства спатрэбілася, каб прыйсці да таго, што і так было відавочна ад пачатку — ніякай арганізаванай структуры беларускіх нацыяналістаў, якая замахваецца на дзяржаўны лад, няма.

Апроч надламаных лёсаў, спаленых нерваў і страчаных кадраў (успомніце, ці застаўся служыць у войску салдат па прызванні Уладзімір Румянцаў?), асобна трэба вылучыць кошт гэтай пастаноўкі.

У кожнага з фігурантаў справы асабістыя рэчы канфіскоўвалі дзясяткамі: сапёрныя лапаткі, страйкбольныя аўтаматы і пісталеты, нажы, муляжы гранат, шаўроны…

А вы ведаеце, колькі каштуе экспертыза бутафорскай зброі?

Напрыклад, каб спецыяліст Камітэта судовых экспертыз пацвердзіў, што страйкбольны аўтамат — не баявы, а ўсё ж страйкбольны, трэба 93 рублі.

Такую суму нам назвалі ў прэс-службе ведамства, калі мы спыталі пра цэны экспертыз у рамках крымінальных спраў.

Сюды ўваходзяць выдаткі на рэагенты, транспарт, святло, працу…

Уявіце цяпер, колькі тысяч рублёў сышло на тое, каб эксперты выявілі, што аўтаматы баявымі не страляюць, муляжныя гранаты не выбухаюць, сталовыя нажы не лятаюць, а шаўроны з арнаментам «Спарыш» — не экстрэмізм?

Дадайце сюды ганарары аператыўнікам за марныя высілкі (успомніце, як КДБ хваліўся, што гадамі вёў «легіянераў»), ганарары журналістам БТ, «СБ» і «Вечерніх Мінсков», паперу для справаводства, кошт харчавання ў СІЗА ўрэшце.

І цяпер паўстае пытанне: хто за гэта ўсё адкажа? Ці будзе прыцягнутая да адказнасці загадкавая «Фрау А.» за паклёп?

Вядома, у КДБ, які распачаў справу, «Фрау А.», да адказнасці не прыцягнуць, бо гэта не ўваходзіць у іх юрысдыкцыю. У Следчым камітэце таксама не кажуць, ці ёсць падставы для прыцягнення «Фрау А.».

У прэс-службе Белдзяржтэлерадыёкампаніі нам не змаглі сказаць, ці дадуць яны абвяржэнне свайму прапагандысцкаму фільму, параілі толькі пісаць да іх пісьмовыя запыты.

Як нам паведамілі «легіянеры», яны маюць намер ісці ў суд з позвамі да ўсіх прапагандыстаў з пазовамі аб абароне годнасці і зняпраўджванні паклёпаў.

Агулам жа «Справа патрыётаў» умацавала недавер да сілавых органаў і дзяржаўных СМІ. Яна замацавала разуменне, што ў Беларусі могуць адарваць ад працы і кінуць за краты тры дзясяткі невінаватых людзей, трымаць іх там 100 дзён, а потым не знойдзецца не толькі віны, але і вінаватых.

• 0
• 0
• 0
• 0
• 0
• 0
• 0
• 0