Следчыя следчага ўпраўлення УСК па Мінску завяршылі расследаванне абставінаў гібелі роўпджампера ў Соснах, што адбылося 18 чэрвеня, паведамляе sk.gov.by.
Следствам устаноўлена, што арганізатар скачкоў на вяроўцы з вышыні 70 метраў не зафіксаваў на выцяжной трубе з тунэлем у прамысловай зоне па вуліцы акадэміка Красіна вяровачную канструкцыю і не ажыццяўляў пастаяннага кантролю за бяспечнай эксплуатацыяй. Таксама мужчына не здолеў прадухіліць наступствы, у выніку чаго загінуў 27-гадовы жыхар Салігорска.
Паводле СК, крымінальная справа з'яўляецца беспрэцэдэнтнай. Расследаванне ажыццяўлялася ва ўзаемадзеянні са спецыялістамі МНС.
Высновы пацверджаны вынікамі аглядаў, пры правядзенні якіх правераны цэласнасць індывідуальнай страховачнай сістэмы і зафіксаваныя месцы мацавання альпінісцкіх тросаў (дзюбеляў), відэазапісы камеры «GoPro», квадракоптара, мабільнага тэлефона і паказанні сведак.
Абвінавачванне індывідуальнаму прадпрымальніку прад'яўлена па ч.1 арт.144 (прычыненне смерці па неасцярожнасці). Віну сваю мужчына не прызнаў. Ён вылучаў розныя версіі і хаваў спосабы ды акалічнасці фіксацыі тых ці іншых вяровачных канструкцый. Ісціну следства высвятляла па запісах з квадракоптара, тэлефона, выніках эксперыменту.
На падставе атрыманых звестак у ходзе следчага эксперыменту прайграныя абстаноўка і абставіны падзення, у тым ліку з выкарыстаннем манекена.
Матэрыялы крымінальнай справы вывучаны пракурорам і накіраваныя ў суд для разгляду.
Каментары