Праўда, усяго адзін дзень.
Аўтар папулярных «Радзіва Прудок» і «Прэм’ера» Андрусь Горват доўгі час працаваў дворнікам у Купалаўскім тэатры. 21 верасня, падчас Тэатральнага пікніка, прысвечанага 100-му сезону Купалаўскага, Горват на ўвесь дзень вернецца на работу. Вядомы пісьменнік будзе сачыць за парадкам у Аляксандраўскім скверы і нават правядзе некалькі экскурсій па закуліссі тэатра ў сваім амплуа. Зарэгістравацца можна на сайце Купалаўскага.
Біяграфія Андруся Горвата падобная да тэатральнай легенды, аднак гэта рэальная гісторыя, якой ганарацца купалаўцы. Некалі на працу дворніка ў тэатр уладкаваўся журналіст-фрылансер Андрусь. Цягам працоўных будняў ён назіраў за тэатральнай дзейнасцю, натхняўся творчасцю і аднойчы вырашыў кардынальна змяніць жыццё. Андрусь з’ехаў у вёску Прудок на Палессі аднаўляць дом свайго дзеда.
Жыццё ў палескай вёсцы моцна адрознівалася ад гарадскога, і былы дворнік Купалаўскага занатоўваў цікавосткі на сваёй старонцы ў Facebook. Пазней допісы ператварыліся ў кнігу «Радзіва Прудок», першую тысячу асобнікаў якой чытачы раскупілі цягам 2-х дзён. Паводле гэтага твора Купалаўскі тэатр паставіў спектакль, а Горват напісаў новую кнігу «Прэм’ера» — пра тое, як Купалаўскі паставіў спектакль па яго творы. Першыя наклады «Прэм’еры» разышліся яшчэ хутчэй. Такой біяграфіі і цяперашняй папулярнасці Андруся Горвата можа пазайздросціць не толькі любы дворнік, але і пісьменнік.
На свяце, прысвечаным 100-му сезону Купалаўскага, можна будзе наведаць тэатральнае закуліссе. Экскурсіі пачнуцца з 12-й гадзіны дня, некалькі з іх правядзе Андрусь Горват. Наведвальнікі даведаюцца, як ствараюцца дэкарацыі да спектакляў, дзе шыюцца касцюмы, колькі часу і грыму трэба на тое, каб падрыхтаваць акцёраў да выступу і многае іншае. Акрамя таго, на Тэатральным пікніку ўпершыню можна будзе пабачыць спектакль Купалаўскага пад адкрытым небам: «Радзіва Прудок» будуць трансляваць праз Voka з тэатральнай сцэны ў жывым эфіры.
Праграма свята пачнецца а 12:00 і працягнецца да 23:00. Госці змогуць пачаставацца ў street-буфеце, зрабіць сабе вусы як у маладога Купалы, амаладзіцца або састарыцца ў грымёрцы «ФэйсАп», атрымаць запрашэнні на закрытыя паказы спектакляў і нават шанец выйсці на сцэну Купалаўскага. Уваход вольны.
-
У Гомельскім драматычным тэатры — кадравыя чысткі. Зноў праз «палітыку»
-
«Будзе смешна і балюча»: «Купалаўцы» прэзентуюць заўтра новы спектакль. У галоўных ролях — Манаеў, Белахвосцік, Гарцуева
-
«Рашэнне прыйшло звонку». Што адбываецца ў віцебскім тэатры, дзе ў спектаклі прагучала «Жыве Фландрыя!» і пачалася чарада звальненняў?
Каментары