У аўтазаку і РУУС быў збіты 14-гадовы школьнік, а цяпер яму не выдаюць накіраванне на судмедэкспертызу
Як распавёў Максім сям'і, за сем гадзін затрымання яго тройчы збілі: адразу білі «людзі ў зялёнай форме», пасля білі ў аўтазаку і ў Цэнтральным РУУС. Як і іншых затрыманых, падлетка прымушалі крычаць «Я люблю АМАП. Слава АМАПу», піша TUT.BY.
Цяпер блізкія Максіма хочуць прыцягнуць да адказнасці тых, хто яго збіў, але праз загружанасць у міліцыі падлетку не даюць накіраванне на судова-медыцынскую экспертызу.
«Восем гадзін мы праляжалі ва ўнутраным дворыку міліцыі, нас было каля 100 чалавек. Спаць немагчыма, вакол цябе ўвесь час ходзяць, не так рассунуў ногі — б'юць кірзачамі ў пах. Б'юць так, што потым ты дакладна ногі ўжо не ссунеш. Правяралі асабістыя рэчы, у 14-гадовага хлопца знайшлі малаток у заплечніку, за гэта яго білі гадзіну. Гэта была цяжкая ноч. Білі ўсіх. Раніцай паставілі да сцяны, мы замярзалі, прасілі, каб дазволілі прысядаць, так станавілася цяплей», — так тое, што адбывалася ў Цэнтральным РУУС Мінска, апісваў TUT.BY затрыманы Аляксандр.
TUT.BY адшукаў сям'ю 14-гадовага Мікіты, у інтарэсах дзіцяці яго імя змененае, але ўсе дадзеныя ёсць у рэдакцыі. Увечары 11 жніўня школьнік ішоў дадому пасля акцыі салідарнасці каля станцыі метро «Пушкінская» і там жа быў затрыманы ў 22.10.
«Кім менавіта, ён не ведае, кажа, гэта былі «людзі ў зялёнай форме». Брат адразу сказаў, што яму 14 гадоў, бо калі саджаюць у аўтазак, пытаюцца прозвішча, імя, дату нараджэння і адрас прапіскі, — распавядае TUT.BY сястра хлопца Наталля. — Мікіту білі пры затрыманні, у аўтазаку і ў Цэнтральным РУУС. Але я хачу адзначыць: малаток у заплечніку ў яго знайшлі толькі пры аглядзе рэчаў у РУУС. Убачылі і раззлаваліся. Мы потым пыталіся, навошта ён узяў гэты малаток, адказаў, што ішоў бараніць краіну. У заплечніку яшчэ знайшлі гамбургер, медыцынскія маскі, бінты, сурвэткі і ваду».
Калі вечарам сям'я не змагла датэлефанавацца да Мікіты, стала набіраць 102, там дапамагчы не змаглі. У 5 раніцы з Цэнтральнага РУУС пазванілі і паведамілі: трэба прыехаць і забраць падлетка. На той момант прайшло ўжо 7 гадзін.
«У брата глыбокія раны на каленях, локцях, сляды на лбе і падбародку — гэта ўсё ад позы, у якой ён доўга стаяў. Іх апускалі на калені, рукі за спінай або за галавой, тварам у асфальт. Яшчэ сляды ад дубінак на ягадзіцах, спіне, нагах, а на руцэ засталіся сляды чужых пальцаў, мабыць, яго ўтрымлівалі, — Наталля пералічвае траўмы школьніка. — Брат сказаў, што пабываў у пекле, самае страшнае і балючае было стаяць на каленях у гэтай позе. У аўтазаку іх прымушалі спяваць гімн, крычаць: «Я люблю АМАП. Слава АМАПу ». Пыталіся ў яго: «За каго, с…, будзеш галасаваць?». Яму ж 14 гадоў! Калі мама прыехала забіраць Мікіту з РУУС, ёй вынеслі на подпіс нейкі пратакол, копію не далі. З таго, што яна запомніла, там было ўказана: Мікіта ўдзельнічаў у антыўрадавым мітынгу, у яго знайшлі малаток. Сказалі, ніякія дакументы маме на працу не пойдуць, у школу таксама, толькі трэба прынесці характарыстыку.
Па словах Наталлі, сям'я ўжо звярталася ў Следчы камітэт з пытаннем аб праходжанні судова-медыцынскай экспертызы, там адправілі ў РУУС па месцы жыхарства.
«Адказалі, што цяпер усе занятыя, трэба тэлефанаваць пасля 19 жніўня і, маўляў, не варта хвалявацца, пабоі не сыдуць. Мы сфатаграфавалі ўсе траўмы і звярнуліся да траўматолага, каб усё зафіксаваць. Хочам прыцягнуць да адказнасці тых, хто біў брата, — дадае Наталля. — Калі хтосьці быў відавочцам таго, што адбывалася з Мікітам пасля затрымання, мы просім адгукнуцца».
Цяпер чытаюць
«Яна не выглядала шчырай, была ў масцы». Паўлючэнка пра сустрэчу Калеснікавай з беларускімі журналістамі23
Каментары