Усё было не так, як паведамілі дзяржСМІ. Што цяпер вядома пра сустрэчу Лукашэнкі з палітвязнямі
Дзяржаўныя СМІ далі інфармацыю пра 4,5-гадзінную сустрэчу Аляксандра Лукашэнкі з палітвязнямі малымі дозамі. Але цяпер па фрагментах, якія даходзяць з турмаў на волю, можна аднавіць большыя часткі карціны.
Палітвязняў звезлі ў СІЗА КДБ з розных турмаў.
Калеснікава ехаць адмовілася.
Не ўсе палітвязні паціснулі руку Лукашэнку. Паказалі поціск рук менш вядомых дзеячаў, Ціханоўскаму ўдалося перадаць на волю, што ён рукі не паціснуў. Верагодна, што і Бабарыка ды іншыя вядомыя вязні адмовіліся, інакш бы гэты поціск паказалі на ТВ.
Ужо да сустрэчы было рашэнне аб вызваленні Васкрасенскага і Рабцэвіча. Толькі гэтым можна патлумачыць, што іх пасадзілі па левую і правую руку ад Лукашэнкі, Васкрасенскі быў нават апрануты ў чыстую кашулю.
Палітвязні скарысталі сустрэчу, каб дабіцца дробных бытавых саступак. Так, Шкляраў папрасіў магчымасці памыцца, а Ціханоўскі — першы раз патэлефанаваць жонцы. І тое, і тое Лукашэнка дазволіў.
Сустрэча не была перамовамі, адно абменам меркаваннямі, перадаў на свабоду Знак.
Палітвязні таксама скарысталі сустрэчу, каб абмяняцца інфармацыяй між сабой.
Сустрэча мае вялікае значэнне, бо яна азначае прызнанне ўладамі легітымнасці сваіх праціўнікаў як боку ў палітычным працэсе. Аляксандр Лукашэнка, хай і ў турме, але сустрэўся з тымі, каго яшчэ нядаўна называў «крымінальнікамі і наркаманамі», «буржуйчыкамі», «шалудзівымі». Усяго некалькі месяцаў таму ён на павышаных тонах заяўляў, што не дасць «зрабіць з іх вязняў сумлення».
Цяпер чытаюць
Калеснікава: Я не разумею, чаму Еўропа не пачала перамовы з Лукашэнкам раней за ЗША71
Каментары