Запрацавала новая анлайн-ініцыятыва — «Сход». Тлумачым, што гэта такое і для чаго патрэбная
У пачатку года ў інтэрнэце з’явіўся сайт «Сход». Для чаго ён існуе і якіх мэтаў дабіваюцца стваральнікі? Паспрабуем патлумачыць у пытаннях і адказах.
Хто стваральнікі?
Невядома, яны не называюць сябе.
Якая мэта?
Даць магчымасць грамадзянам Беларусі абіраць прадстаўнікоў сваіх інтарэсаў. У ідэале па ўсёй краіне такіх людзей павінна набрацца 328 чалавек. І ўжо на мясцовым узроўні, лічаць арганізатары, яны змогуць весці дыялог з уладамі. Дарэчы, стваральнікі падкрэсліваюць, што ні да якой палітычнай сілы яны не належаць.
Ці захочуць гэтага ўлады?
Мабыць, будзе залежаць ад палітычнай кан’юнктуры. На сёння не бачна, што яны зацікаўленыя ў перамовах, але, магчыма, сітуацыя зменіцца. Ды і сама ідэя, кажуць арганізатары, належыць уладам, якія самі неаднаразова казалі: «Фарміруйце сваіх прадстаўнікоў — будзем весці дыялог».
Што з гэтага можа атрымацца?
Ініцыятары спадзяюцца, што дэлегатам «Сходу» ад імя народа атрымаецца выказваць набалелыя праблемы і весці любы дыялог з уладамі. Мабыць, у выпадку рэалізацыі можам атрымаць некалькі дзясяткаў, а ў лепшым выпадку некалькі сотняў, моцных рэгіянальных лідараў. Праўда, пры цяперашніх умовах гэта можа прывесці да падвышанага інтарэсу да гэтых людзей з боку сілавікоў.
Як стаць дэлегатам?
Неабходна на сайце запоўніць анкету, а таксама запісаць відэазварот, дзе будуць агучаныя праблемныя момант для пэўнага рэгіёна, калі збор заявак будзе завершаны, то людзі змогуць прагаласаваць за таго прэтэндэнта, які ім спадабаўся найбольш, праз вайбер ці тэлеграм з уключанай геалакацыяй.
Гэта будуць альтэрнатыўныя дэпутаты?
Стваральнікі кажуць, што яны ні ў якім разе не хочуць замяняць сабой органы ўлады. А толькі шукаюць людзей здольных якраз з уладай размаўляць па балючых пытаннях.
Ці стане платформа папулярнай?
Вядома, залежыць ад саміх людзей, якія адгукнуцца прыняць удзел у такім «галасаванні», ці не. На гэта момант вядома, што заяўкі стаць дэлегатамі «Сходу» падалі больш за 200 чалавек з 150 акруг. Не так і шмат, здаецца, але ў сённяшніх палітычных рэаліях такое «балатаванне» з’яўляецца актам мужнасці.
Хто хоча быць дэлегатам?
Найбольш людзей са сферы прамысловасці, будаўніцтва і ІТ адпаведна 24, 16 і 15 чалавек. Далей ідуць маркетынг, эканоміка і навука — 13, 11 і 10. Самаму сталаму 70 гадоў, самаму маладому — 22. Ясная справа, што ў лідарах вылучэння Мінск і Мінскай вобласць. Галасаванне пачнецца ў лютым.
Цяпер чытаюць
Гэтая беларуская інстазорка дайшла да Playboy — але, у адрозненне ад многіх, не спынілася7
Каментары