«Паступаюць пагрозы на мабільны нумар». Вайскоўцы са «справы Шутава» ў Брэсце патрабуюць закрыць працэс
Аб гэтым пацярпелыя Гаўрылаў і Галіцын заявілі на другі дзень працэсу. Яны сцвярджаюць, што турбуюцца аб уласнай бяспецы, піша Радыё Свабода.
Суд па справе Аляксандра Кардзюкова і Генадзя Шутава пачаўся ў Брэсце ў аўторак. На ім у якасці пацярпелых знаходзяцца вайскоўцы мар’інагорскага спецназа (вайсковая частка № 89417) Раман Гаўрылаў і Арсеній Галіцын.
У працэсе былі агучаныя некаторыя іх даныя, а таксама імёны і месца службы. Высветлілася, што менавіта Раман Гаўрылаў стрэліў у Генадзя Шутава і забіў яго.
Чытайце:
«Хацеў стрэліць у перадплечча». Вайсковец, які 11 жніўня забіў Генадзя Шутава, даў паказанні
Закрыць працэс пацярпелыя спрабавалі яшчэ да пачатку слуханняў. Яны падыходзілі да сакратара і патрабавалі пусціць у залу толькі «правільных людзей». У выніку іх просьба не была задаволеная, у залу трапілі журналісты і родныя, сябры абвінавачаных Шутава і Кардзюкова.
«Хачу заявіць хадайніцтва аб вядзенні закрытага судовага пасяджэння ў сувязі з неабходнасцю гарантавання бяспекі пацярпелых, — заявіў суддзі Арсеній Галіцын адразу на пачатку пасяджэння. — Нам паступаюць пагрозы на мабільныя тэлефоны з невядомых нумароў. «Як жывецца тваім бацькам, як ім спіцца? Добра? Цябе знойдуць, мы цябе прыкончым», — працытаваў Галіцын паведамленні са свайго тэлефона.
Ён таксама паведаміў, што пагрозы пачалі прыходзіць яму адразу пасля завяршэння першага дня пасяджэння. Другі пацярпелы, Раман Гаўрылаў, таксама расказаў пра пагрозы ў свой адрас і папрасіў закрыць суд.
Хадайніцтва пацярпелых падтрымаў пракурор Генадзь Буры, супраць выступіў абвінавачаны Кардзюкоў і дачка абвінавачанага Генадзя Шутава Анастасія. Суддзя Святлана Крэмянёўская пасля кароткай нарады ў хадайніцтве адмовіла, суд працягваецца ў адкрытым рэжыме.
Цяпер чытаюць
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»6
Каментары