Улады Чачні паказалі відэа з вывезенай сілавікамі ў Грозны жонкай вядомага суддзі. Жанчына на кадрах гаворыць з цяжкасцю і блытае словы. Зарэма Мусаева, якую прымусова вывезлі з дому чачэнскія сілавікі, праходзіць сведкай па крымінальнай справе, заяўляў кіраўнік расійскай аўтаноміі Рамзан Кадыраў.
Дзяржаўная тэлекампанія «Грозны» ў сваім інстаграме апублікавала відэа з вывезенай чачэнскімі сілавікамі з Ніжняга Ноўгарада Зарэмой Мусаевай — жонкай былога суддзі Вярхоўнага суда Чачні Сайдзі Янгулбаева. Хворая на дыябет жанчына ў гутарцы з упаўнаважаным па правах чалавека ў Чачні Мансурам Салтаевым кажа, што ёй далі неабходныя лекі і што гвалт да яго не ўжываўся.
Пры гэтым жанчына з цяжкасцю размаўляе і блытае словы.
«Я цяпер пераканаўся, што ніякага гвалту да вас не ўжывалася, стан у вас цяпер… мы разумеем, інсуліназалежны, зараз вас лекар агледзіць. Мы пытанне трымаем на кантролі», — кажа ў відэа ўпаўнаважаны па правах чалавека.
«Гэта суцэльнае пекла. У мяне няма слоў. Я не веру, што такое можа адбывацца ў Расеі. Я ведаю сваю маці, і цяпер на відэа яна ў вельмі цяжкім стане і проста ніякая», — пракаментаваў з'яўленне відэа яе сын, Абубакар Янгулбаеў.
Рамзан Кадыраў паабяцаў сям'і экс-суддзі з Чачні месца «ў турме або пад зямлёй», паведамляе расійскае выданне РБК.
Рэч у тым, што Зарэма Мусаева і суддзя Сайдзі Янгулбаеў — бацькі вядомага ў Чачні праваабаронцы Абубакара Янгулбаева. Улады Чачні падазраюць яго ў тым, што ён вядзе тэлеграм-канал «1Адат», які раней быў прызнаны грозненскім судом «экстрэмісцкім». У гэтым канале публікуецца крытыка Кадырава і ўладаў аўтаноміі, дзе існуе рэжым жорсткай аднаасобнай улады.
Цяпер чытаюць
Вядучы СТБ Раман Пратасевіч пабраўся шлюбам трэцім разам23
Каментары