Працэс пераводу казахскай мовы на лацінку можа запаволіцца. Такаеў сказаў, што спяшацца не варта
Прэзідэнт Казахстана Касым-Жамарт Такаеў пракаментаваў пытанне аб пераходзе казахскай мовы на лацінку. Сказаў, што ў такіх справах нельга спяшацца.
![](http://nnexpictures.fra1.digitaloceanspaces.com/img/w732d4webp1/photos/z_2022_02/16737569_0_0_3631_2048_1440x900_80_0_1_f886f671c0dcb42c9d67b9c98c2a790fjpg-j3kj5.jpg.webp)
У інтэрв'ю нацыянальнаму тэлеканалу Qazaqstan Такаеў сказаў:
«Што тычыцца нашай мовы, то мы і яе захаваем. Інакш і быць не можа, бо ў самыя складаныя моманты гісторыі мова захавалася дзякуючы нашым мудрым продкам, дзякуючы нашаму народу».
Разам з тым Казахстану, паводле Такаева, патрэбная моўная рэформа:
«І тут справа не ў больш хуткім пераходзе на лацінскую графіку. Да гэтага пытання варта падысці з усёй сур'ёзнасцю. Неабходная дбайная экспертыза. Нельга спяшацца ў такіх пытаннях, як моўная палітыка, бо гэта вельмі адчувальная тэма».
У 2017 годзе экс-прэзідэнт Казахстана Нурсултан Назарбаеў падпісаў указ аб паэтапным пераводзе казахскай мовы з кірыліцы на лацінку да 2025 года. У студзені 2021 года ўрад Казахстана заявіў, што пераход на лацінку пройдзе з 2023 па 2031 год. Цяпер, магчыма, тэрміны яшчэ больш ссунуцца.
Каментары