Латушка заклікаў прызнаць Беларусь тэрыторыяй, часова акупаванай Расіяй
Народнае антыкрызіснае ўпраўленне выдала заяву, у якой сцвярджае, што Беларусь акупаваная Расійскай Федэрацыяй і заклікае міжнародную супольнасць зыходзіць з гэтага факта. Заяву агучыў у відэазвароце старшыня НАУ Павел Латушка.
У заяве канстатуецца, што «Рэспубліка Беларусь з'яўляецца часова акупаванай тэрыторыяй, Расійская Федэрацыя — краінай-акупантам, а рэжым Лукашэнкі — марыянеткавым урадам».
Саюзнікі па дэмакратычным руху заклікаюцца падтрымаць гэтую пазіцыю, а замежныя партнёры — даць адпаведную міжнародна-прававую ацэнку сітуацыі, якая склалася.
Паводле заявы, у выніку шырокага прызнання на міжнароднай арэне факту акупацыі Беларусі Расійскай Федэрацыяй стане магчымым эфектыўнае прасоўванне прынцыповых для Беларусі і яе будучыні пытанняў:
1) Аб захаванні тэрытарыяльнай цэласнасці і незалежнасці Беларусі. У такім выпадку магчымыя дзеянні акупантаў, прызнаных такімі, па змене юрыдычнага статусу акупаванай тэрыторыі не будуць мець ніякай сілы з пункту гледжання міжнароднага права.
2) Аб прадухіленні размяшчэння на тэрыторыі Беларусі расійскай ядзернай зброі і стварэння пагроз рэгіянальнай бяспецы.
3) Аб ацэнцы любой актыўнасці грамадзян Беларусі па супрацьстаянні рэжыму Лукашэнкі і расейскай акупацыі як дзеянняў, якія здзяйсняюцца ў рамках нацыянальна-вызвольнага руху па абароне суверэнітэту і незалежнасці нашай краіны.
4) Аб пазбаўленні марыянеткавага ўрада Лукашэнкі міжнародна-прававой суб'ектнасці і аб прыпыненні членства Беларусі ў міжнародных арганізацыях да спынення акупацыі і дэмакратычнага фарміравання новага ўрада.
5) Аб сінхранізацыі санкцый у дачыненні да Расіі і Беларусі як акупаванай тэрыторыі і ліквідацыі магчымасцяў для Расіі, каб абыходзіць санкцыі праз Беларусь і выкарыстанні яе як афшорнай зоны.
Цяпер чытаюць
Лукашэнка загадаў забараніць арганізаваныя паездкі дзяцей за мяжу без дазволу дзяржавы12
Каментары