Тур па Расіі і ўзнагароды ад міліцыі. Што адбываецца ў жыцці праўладных беларускіх зорак?
Выступ спевака Руслана Аляхно на канцэрце да Дня Расіі ў акупаваным Херсоне выклікаў вялікую хвалю абурэння — дастаткова пачытаць негатыўныя каментарыі ў яго ў Інстаграме пад фота і відэа адтуль. Паглядзелі, чым жывуць іншыя праўладныя зоркі і дзе сябе сёння праяўляюць.
Анатоль Ярмоленка завёў уласную старонку ў Інстаграме толькі на пачатку бягучага года: дагэтуль усе асноўныя падзеі з яго творчага жыцця трансляваліся ў агульным акаўнце ансамбля «Сябры».
Збольшага Ярмоленка дзеліцца архіўнымі фотаздымкамі і відэа з творчасці «Сяброў», важнымі для яго сямейнымі падзеямі і дэманструе ўдзел у шоу «Дзве зоркі — бацькі і дзеці» ці ў канцэртах — напрыклад, да Дня Перамогі.
Вікторыя Алешка была адной з тых, хто, як Ярмоленка і шэраг іншых беларускіх спевакоў, запісваў нашумелую песню «Любімую не аддаюць».
У яе жыцці ўсё досыць стабільна і багемна: прэзентацыя песень на АНТ і іншых дзяржканалах і радыё, юбілейны канцэрт «25 год на сцэне», святы ў Маладзечне і Століне, «Тэлевяршыня» і торты на дзень нараджэння.
Сёстры Груздзевы — заўсёдніцы прадзяржаўных мерапрыемстваў. У стужцы іх Інстаграма — выступы на Дні перамогі, на канцэрце для супрацоўнікаў ГУБАЗіКа, наведванне прэміі «Тэлевяршыня». Ганарацца сёстры сваім выступам і на перадачы «Што? Дзе? Калі?» на АНТ, у якой хутка возьмуць удзел прапагандысты з гэтага тэлеканала.
Але ёсць у профілі Груздзевых месца і жыццёвым сюжэтам. Так, адна з сясцёр, Аляксандра не хавае радасці пасля наведвання дэльфінарыя і заапарка: «Бачылі белага паўліна. Ён распусціў свой шыкоўны хвост і танчыў! А людзі казалі, што гэта так рэдка адбываецца, што той, хто гэта ўбачыць, яму абавязкова пашанцуе».
Падобная праграма жыцця і ў спявачкі, удзельніцы Еўрабачання-2013 Алёны Ланской: уганараванне дзяржаўнымі знакамі, канцэрт да Дня перамогі, выступы ў эфіры «Добрай раніцы, Беларусь», вядзенне ранішняга шоу на «РТР-Беларусь».
Нечаканым на гэтым фоне глядзіцца ўдзел у цырымоніі ўзнагароджвання прэміі «Шансон года 2022», якая прайшла ў Крамлёўскім палацы ў Маскве. Ланская стала лаўрэаткай конкурсу з песняй «Наша шчасце адно».
У Аляксандра Саладухі працягваецца тур па Беларусі «Маладыя пацаны». І гэта не канец — пасля ён адправіцца ў новае кола на 120 канцэртаў з 14-м альбомам «Мы жывыя».
У сацсетках музыкі ціха і спакойна. Прычыны такога штылю Саладуха сам сфармуляваў у адным з інтэрв’ю:
«Канечне, шмат каментарыяў станоўчых, але паралельна каментарыі ў іншы бок, з пагрозамі, мацюкамі. Тыпу таго, што было ў жніўні 2020 года праз маю пазіцыю пасля прэзідэнцкіх выбараў. Хаця не: тады ўвогуле быў шок. Да 500 пагроз, зняваг прыйшло мне, маёй жонцы, дзецям, унукам. Я нікому не адказаў на хэйт. Усе негатыўныя каментарыі я проста выдаляю, выціраю і з усмешкай іду далей».
Дзейны рэкардсмэн на «Еўрабачанні» ад Беларусі Зміцер Калдун працягвае захопліваць расійскую аўдыторыю. Апошні з яго выступаў адбыўся на фестывалі «Саматлорскія ночы» ў Ніжневартаўску. Фестываль быў прымеркаваны да Дня Расіі. Сцэну з Калдуном падзялілі Хор Турэцкага і гурт «Горад-312».
Гюнэш хваліцца сваімі ўзнагародамі «За садзейнічанне» і «За супрацоўніцтва» ад беларускай міліцыі, віншуе ў стужцы асабістага акаўнта Лукашэнку з днём нараджэння, забаўляе людзей у Тэатры эстрады, выступае на 100-годдзі прадпрыемства «Белдругмет» і збіраецца на «Славянскі базар».
Дарэчы, хэдлайнеры віцебскага фестывалю ў гэтым годзе — Сяргей Бязрукаў, які ўхваляе вайну ва Украіне і Рыгор Лепс, якія наведваў з канцэртам самаабвешчаную «ДНР».
З беларускіх артыстаў на адкрыццё фестывалю прыедуць Аляксандар Саладуха, Руслан Аляхно, Анатоль Ярмоленка, Ірына Дарафеева, Алёна Ланская, «Сябры», «Песняры», Тэа.
Яшчэ адна з удзельніц відэа «Любімую не аддаюць» Юлія Быкава з гурта AURA (між іншым, адна з Жанчын года Беларусі — 2020, па версіі Беларускага саюза жанчын) у працоўным Інстаграме задаецца звычайна ўсяго адным пытаннем «1-е, 2-е ці 3-е фота?»
Юлія не так даўно, як і Гюнэш, атрымала падзяку ад міліцыі «за патрыятызм».
Юрый Вашчук, больш вядомы як Тэа, які прадстаўляў Беларусь на «Еўрабачанні» з песняй «Cheesecake», цяпер адпачывае ў Турцыі. Да гэтага разам з жонкай Вольгай Рыжыкавай ён адвёў выпускны для школьнікаў у «Мінск-арэне» і адкатаў з ёй жа канцэрты па Беларусі.
Спявачка Жанэт піярыць культурна-спартовы фэст «Вытокi. Крок да Алiмпу», які прысвечаны Году гістарычнай памяці і па чарзе праходзіць у шасці гарадах Беларусі: Рэчыцы, Століне, Навагрудку, Горках, Полацку і Капылі. Разам з «Песнярамі» яна таксама адзначылася на мерапрыемстве да Дня Перамогі і ззяла на Мінскім трактарным заводзе.
Занятая Жанэт і ў тэатры. У Моладзевым тэатры эстрады 16 чэрвеня адбылася прэм’ера мюзікла-біяграфіі «Гур’янаў» пра старца з праваслаўнай царквы Мікалая Гур'янава. П’есу для тэатра пісала сама мастацкая кіраўніца Уладзіслава Арцюкоўская. Акрамя Жанэт, са спевакоў там задзейнічаная салістка Вялікага тэатра оперы і балета Марта Данусевіч.
Падпісанты могуць сачыць за перасоўваннямі Жанэт на сямейнай «Волзе» 1968 года выпуску. Напярэдадні ж вайны ва Украіне спявачка зладзіла фотасесію з самаварам і абаранкамі, падпісаўшы яго «Расія. Беларусь. Сяброўства. Дзве сястры».
Акрамя вышэй згаданых канцэртаў на дзяржаўных святах, сённяшнія «Песняры» актыўна катаюцца па Расіі. Толькі за май яны наведалі Новую Усмань, Калугу, Белгарад, Тулу, Бранск, Смаленск, Курск і Санкт-Пецярбург.
З адметных падзей у фотасправаздачах гурта — наведванне іх міністрам культуры Анатолем Маркевічам, удзел у здымках шоу «Народны кухар» на АНТ і пераход на летні варыянт касцюмаў.
Чытайце таксама:
Комік Ідрак Мірзалізадэ выклаў фрагмент свайго першага беларускамоўнага стэндапу ВІДЭА
Беларускі дызайнер распавёў, як радыкальна змяніў сябе: зрабіў зубы і нос, павялічыў рост, перасадзіў валасы
Ад Саладухі да Каржа. Што беларускія селебрыці посцяць падчас вайны і як пра яе выказваюцца
Гайдукевіч узяў новы ўзровень хамства — прапанаваў знайсці жанчын, якія ацэняць, ці яго член быў на дыкпіку33
Каментары