Грамадзянам Польшчы з 1 ліпеня дазволілі бязвізавы ўезд у Беларусь
Дзяржаўны памежны камітэт паведаміў, што «ў мэтах падтрымання добрасуседскіх адносін» Лукашэнка ўвёў часовы бязвізавы рэжым для грамадзян Польшчы. Новаўвядзенне будзе дзейнічаць з 00 гадзін 1 ліпеня па 31 снежня ўключна.
Тлумачыцца, што грамадзянам Польшчы можна будзе перасякаць мяжу без візы ў пунктах пропуску на беларуска-польскім участку мяжы. Таксама ім будзе дазволена наведванне памежнай зоны без пропуску. Пры ўездзе ў Беларусь у пункце пропуску дастаткова будзе вусна паведаміць супрацоўніку органаў памежнай службы аб намеры наведаць памежную зону з пазначэннем населеных пунктаў і мэты іх наведвання.
Для бязвізавага ўезду ў Беларусь палякам неабходна будзе прад'явіць толькі сапраўдны дакумент для выезду за мяжу, зялёную карту (пры ўездзе на машыне), а таксама мець пры сабе медыцынскую страхоўку. ПЛР-тэст ці сертыфікат аб вакцынацыі не патрабуюцца.
Раней бязвізавы рэжым быў уведзены таксама для грамадзян Літвы і Латвіі.
Каментары