Міністр эканомікі і інавацый Літвы Аўшрыне Арманайце заявіла, што не ўспрымае сур'ёзна пагрозы Расіі адносна прыпынення транзіту часткі яе тавараў праз Літву ў Калінінград. Па словах міністра, Літва незалежная ад Расіі, бо «не купляе ў яе ні электраэнергію, ні газ», піша Delfi.lt.
«Вядома, кібератакі не спрыялі агульнаму і інвестыцыйнаму асяроддзю, але можна сказаць, што мы прывыклі да іх (расійскіх) метадаў працы», — заявіла Арманайце журналістам у панядзелак пасля прэзентацыі Літоўскага касмічнага сектара ў Вільні.
Па словах міністра, з-за прыпыненага транзіту Расія можа аказваць ціск не на Літву, а на іншыя краіны Еўрасаюза, напрыклад, на Германію.
«Што (Расія) магла б зрабіць, дык гэта аказаць ціск на краіны, якія ў большай ступені залежаць ад энергарэсурсаў з Расіі, Германію ці іншыя краіны. Аднак на самай справе мы не бачым такіх прамых эканамічных наступстваў, бо ў Літвы цяпер няма колькі-небудзь значных эканамічных адносін (з Расіяй)», — сказала міністр.
Губернатар Калінінградскай вобласці Антон Аліханаў у сваім тэлеграм-канале ў панядзелак напісаў, што ўлады рэгіёна настойваюць на нераспаўсюджванні абмежаванняў на транзіт у Калінінградскую вобласць. «У якасці меры ў адказ прапануем поўную забарону на рух тавараў (у тым ліку транзітных з трэціх краін) паміж трыма прыбалтыйскімі краінамі і Расіяй (з выключэннем для Калінінградскай вобласці). Гэта дазволіць загрузіць марскіх перавозчыкаў і даць працу калінінградскім партам, якія моцна пацярпелі ад абмежаванняў з боку ЕС», — дадаў Аліханаў.
Цяпер чытаюць
Ад рэкету да продажу фота магіл. Як выглядае знутры групоўка Project X, якая вярбуе людзей для перавозкі мігрантаў з Беларусі ў ЕС4
Каментары