Ministr ekanomiki i inavacyj Litvy Aŭšrynie Armanajcie zajaviła, što nie ŭsprymaje surjozna pahrozy Rasii adnosna prypynieńnia tranzitu častki jaje tavaraŭ praź Litvu ŭ Kalininhrad. Pa słovach ministra, Litva niezaležnaja ad Rasii, bo «nie kuplaje ŭ jaje ni elektraenierhiju, ni haz», piša Delfi.lt.
«Viadoma, kibierataki nie spryjali ahulnamu i inviestycyjnamu asiarodździu, ale možna skazać, što my pryvykli da ich (rasijskich) mietadaŭ pracy», — zajaviła Armanajcie žurnalistam u paniadziełak paśla prezientacyi Litoŭskaha kaśmičnaha siektara ŭ Vilni.
Pa słovach ministra, z-za prypynienaha tranzitu Rasija moža akazvać cisk nie na Litvu, a na inšyja krainy Jeŭrasajuza, naprykład, na Hiermaniju.
«Što (Rasija) mahła b zrabić, dyk heta akazać cisk na krainy, jakija ŭ bolšaj stupieni zaležać ad enierharesursaŭ z Rasii, Hiermaniju ci inšyja krainy. Adnak na samaj spravie my nie bačym takich pramych ekanamičnych nastupstvaŭ, bo ŭ Litvy ciapier niama kolki-niebudź značnych ekanamičnych adnosin (z Rasijaj)», — skazała ministr.
Hubiernatar Kalininhradskaj vobłaści Anton Alichanaŭ u svaim telehram-kanale ŭ paniadziełak napisaŭ, što ŭłady rehijona nastojvajuć na nieraspaŭsiudžvańni abmiežavańniaŭ na tranzit u Kalininhradskuju vobłaść. «U jakaści miery ŭ adkaz prapanujem poŭnuju zabaronu na ruch tavaraŭ (u tym liku tranzitnych z trecich krain) pamiž tryma prybałtyjskimi krainami i Rasijaj (z vyklučeńniem dla Kalininhradskaj vobłaści). Heta dazvolić zahruzić marskich pieravozčykaŭ i dać pracu kalininhradskim partam, jakija mocna paciarpieli ad abmiežavańniaŭ z boku ES», — dadaŭ Alichanaŭ.
Ciapier čytajuć
Łukašenka vykazaŭsia pra deficyt miedykaŭ i prapanavaŭ im pracavać bolš9
Kamientary