Новы мітрапаліт панізіў Фёдара Поўнага да ключара. Сам Поўны: Адкрыйце Вікіпедыю! Мяне павысілі!
Як стала вядома «Нашай Ніве», страціў пазіцыі Фёдар Поўны, якога называлі «духаўніком Лукашэнкі». Папярэдні мітрапаліт Павел з Поўным проста ваяваў. А вось Веніямін прыдумаў хітры ход. Лукашэнка за былога фаварыта не ўступіўся.
Фёдар Поўны — уплывовы святар, сакратар і памочнік Мітрапаліта Філарэта, паспяховы бізнэсмен з вялікімі амбіцыямі. Яму адзінаму са святароў дазволілі пабудаваць палацык у элітным квартале Драздоў.
У свой час амбіцыі Поўнага сутыкнуліся з супрацьдзеяннем Масквы — патрыярх Кірыл не давяраў Поўнаму. Пастаўлены ў Беларусь мітрапаліт Павел увайшоў з ім у адкрытую канфрантацыю і прылюдна абяцаў «посадить этого жирного попа» — яму здавалася смешным жартам такое перакручванне прозвішча з адсылкай да саліднага багацця Поўнага.
Павел адпраўляў у маскоўскі Сінод скаргі на Поўнага, пісаў на яго заявы ў беларускія органы, але непатапляльны Поўны захоўваў свае пазіцыі, дзякуючы набліжанасці да Лукашэнкі.
Як тлумачаць «Нашай Ніве» знаёмыя з сітуацыяй дзеячы царквы, пасля адстаўкі мітрапаліта Паўла (які, нечакана для ўсіх, праявіў чалавечую пазіцыю падчас тэрору супраць нязгодных з фальсіфікацыямі на выбарах) і прызначэння мітрапаліта Веніяміна (Віталя Тупекі) на пасаду патрыяршага экзарха Поўны спачатку ўмацаваў свой уплыў.
Але пасля мітрапаліт Веніямін пайшоў на хітрасць: сваім указам ён ператварыў Усіхсвяцкі храм у Сабор, якім, паводле канонаў, можа кіраваць толькі прадстаўнік чорнага духавенства, манах.
Фёдаў Поўны — прадстаўнік белага духавенства, жанаты святар. У храме, які ён будаваў, песціў і лічыў сваім, Поўнаму было прапанавана застацца ключаром.
Як можна меркаваць па інфармацыі на сайце Мінскай епархіі, Поўны з гэтай прапановай вымушаны быў пагадзіцца. Цяпер ён ключар.
Гэта пасада ў храме праваслаўнай царквы, якую можна параўнаць з намеснікам настаяцеля — ключар кіруе іншымі святарамі ў межах пастаўленых настаяцелем задач.
Пасаду ключара таксама можна параўнаць з дзейнасцю намесніка па фінансавых пытаннях. У выпадку Поўнага гэта такі пасыл: кіруй фінансамі, але ва ўладу не лезь.
Ключар павінен узгадняць з кіраўніком храма дзеянні: у таго і пячаткі, і подпісы.
Пры гэтым Поўны захоўвае магчымасць працягваць весці бізнэс у «Доме міласэрнасці», які, па сутнасці, уяўляе сабой медыцынскую клініку платных паслуг, дзе вялікую частку работы робяць царкоўныя валанцёры.
Лукашэнка не стаў умешвацца ў разборкі ўнутры беларускай царквы.
На сайце мінскай епархіі не ўказана імя новага настаяцеля Усіхсвяцкага храма. Імаверна, гэта сам патрыяршы экзарх Веніямін.
Сам Фёдар Поўны ў адказ на званок журналістаў сцісла адказаў, што «вы чудакі», «нічога не разумееце».
«Усе спрабуюць сітуацыю неяк вывернуць, пакпіць, хто як. А вы, між тым, адкрыйце Вікіпедыю: ключар — гэта памочнік экзарха ў храме! Пры чым тут «панізілі»? Вы не так успрымаеце ўсё, няма ніякай праблемы, гэта высмактана з пальца, людзі не разумеюць, што такое ключар, толькі кажуць, не разабраўшыся. Адкрыйце Вікіпедыю! Стаў яшчэ вышэй!» — сказаў Поўны.
Але папулярная думка ў праваслаўных колах супрацьлеглая.
«Так, прынізіў, — пацвердзіў «Нашай Ніве» праваслаўны святар. — Гэта пры тым, што Поўны вельмі быў рады, што знялі Паўла, і яўна спадзяваўся на значную пасаду. Напрыклад, даўно свабодная вакансія кіраўніка спраў. Але Веніямін даў яму нейкую левую пасаду кіраўніка новага аддзела па працы з ВНУ і зняў яго з настаяцельства у яго казырным храме».
«Наша Нiва» — бастыён беларушчыны
ПАДТРЫМАЦЬЗвязацца з аўтарам можна ў тэлеграме па ніку @artsiom_harbatsevich ці праз мэйл [email protected]
Цяпер чытаюць
Больш за 60 чалавек затрыманыя пасля канцэрта Макса Каржа ў Франкфурце-на-Майне. Са сцэны спявак заклікаў спыніць вайну ва Украіне7
Каментары