Кіраўнік Службы аховы дзяржмяжы Літвы: Беларускія памежнікі з помсты пашкоджваюць агароджу
Беларускія памежнікі працягваюць пашкоджваць фізічную агароджу на мяжы з Літвой, сказаў кіраўнік Службы аховы дзяржмяжы (САДМ) Рустам Любаеў, паведамляе Delfi.lt.
«Мы можам сказаць, што фізічны бар'ер пашкоджваюць наўмысна. Беларускія памежнікі робяць гэта з помсты, робяць гэта дэманстратыўна нават там, дзе гэта фіксуюць нашы сістэмы. Аднак большая частка пашкоджанняў фіксуецца там, дзе сістэм назірання няма», — сказаў журналістам кіраўнік САДМ.
Любаеў заўважыў, што злавіць шкоднікаў складана, паколькі пасля нанясення шкоды яны адразу сыходзяць і да прыезду памежнікаў на месцы іх не знайсці. А беларускія структуры на такія дзеянні не рэагуюць нават пасля таго, як літоўскія памежнікі паведамляюць ім пра гэта.
«Калі бачаць, што едзе наш патруль, шкодніцкія дзеянні спыняюцца. Тады беларускія памежнікі або мігранты адразу сыходзяць у глыб беларускай тэрыторыі. Мы фіксавалі выпадкі нанясення шкоды беларускімі памежнікамі, нават перадалі афіцыйнае паведамленне ў сувязі з гэтым. Адказу нейкага не было, альбо адказваюць, што такі выпадак устанавіць не ўдалося», — сказаў Любаеў.
Па словах міністра ўнутраных спраў, відавочна, што гібрыдная атака супраць Літвы працягваецца. «Беларускія памежнікі з намі не супрацоўнічаюць, супраць нас арганізаваная гібрыдная атака», — сказала Агне Білатайце.
Калі б яны былі затрыманыя, у дачыненні да іх ужылі б санкцыі. «Фізічны бар'ер стаіць на літоўскай тэрыторыі. Такога чалавека затрымалі б і прымянілі б у дачыненні да яго санкцыі за парушэнне дзяржмяжы і за псаванне маёмасці», — заўважыў Любаеў.
Цяпер чытаюць
Вызвалены палітвязень Мікіта Емяльянаў, якога арыштавалі яшчэ ў 2019 годзе, 19‑гадовым8
Вызвалены палітвязень Мікіта Емяльянаў, якога арыштавалі яшчэ ў 2019 годзе, 19‑гадовым
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары