У бізнэс-цэнтры, дзе раней быў Wargaming, цяпер офіс можна зняць бясплатна
На сайце бізнэс-цэнтра «Хваля» (раён станцыі метро «Магілеўская»), які раней практычна цалкам арандавала кампанія Wargaming, з'явілася прывабная абвестка, заўважыў CityDog.
«Пры заключэнні дамовы арэнды да 1 лістапада 2022 года (тэрмінам на 1,5 года мінімальна) арандатару даюцца арэндныя канікулы на 6 месяцаў, — паведамляюць у абвестцы. — Наступныя 6 месяцаў стаўка арэнды 5 еўра, наступныя 6 месяцаў — 6 еўра».
Арэндадаўцы сцвярджаюць, што ўсе офісы (а тут можна знайсці плошчы і па 40 «квадратаў») з рамонтам.
Рэч у тым, што «Хваля» будавалася адмыслова для кампаніі «Wargaming», якая займала ў свой час увесь будынак. Але вясной 2022 года кампанія заявіла пра свой сыход з Беларусі, паспеўшы прадаць актывы.
Новым уласнікам беларускага бізнэсу стала расейская Lesta. Аднак да 80% супрацоўнікаў Wargaming вырашылі не працаваць пад кіраўніцтвам расіян. «Большая частка з іх засталася ў WG і пераехала ў іншыя краіны, невялікая частка не захацела рэлацыравацца і звольнілася, — расказаў адзін з цяперашніх супрацоўнікаў выданню «Зеркало». — Калі груба, то, па маіх прыкідках, у мінскім офісе Lesta цяпер у раёне 400 чалавек. Магчыма, крыху менш. Калі раней у нас быў увесь бізнэс-цэнтр «Хваля», то цяпер толькі пара паверхаў».
Мяркуючы па ўсім, пасля сыходу Wargaming плошчы ў «Хвалі» засталіся незапатрабаванымі, што і вымусіла ўладальнікаў аб'яўляць арэндныя вакацыі.
Каментары