«Дык ты маскаль… — Я рускі, дарагая». Беларускі рэжысёр зняў фільм пра вайну — трэйлер збянтэжыў людзей
Беларускі рэжысёр Вячаслаў Сікора здымае фільм пра вайну «Руzzкі свет». Плануецца, што фільм будзе гатовы ў снежні. У твітары рэжысёр апублікаваў трэйлер будучай стужкі.
Падзеі ў фільме адбываюцца ў Беларусі і Украіне. Як можна меркаваць з трэйлера, там расказваецца пра мужчыну-расейца, які падтрымлівае «спецаперацыю», гаворыць штапмамі прапаганды і спрабуе сілай дабіцца жанчыны, якой ён агідны.
У гэтай ролі галоўнага адмоўнага персанажа зняўся сам Сікора.
Друзья, мы заканчиваем фильм. Прошу репост! Слава Украiнi pic.twitter.com/bisSVqHpFI
— Вячаслау Сiкора (@SIKORA_slava) October 21, 2022
«Гэты фільм валанцёрскі, бюджэт фільма — каля 200 тысяч даляраў», — расказваў ён на сваім ютуб-канале. Нехта з акцёраў пагаджаўся працаваць за 50 ці 100 даляраў за змену, хтосьці з каманды дапамагаў на здымачнай пляцоўцы бясплатна, дзяліўся Сікора. Перад здымкамі ён наведваў Украіну, каб лепш адчуць сітуацыю.
Сродкі, якія ўдасца атрымаць з пракату, рэжысёр плануе накіраваць на дапамогу ўкраінскаму войску.
Водгукі на трэйлер спрэчныя. Ёсць тыя, хто хваліць яго і чакае прэм'еры, але многія скептычна ўспрынялі тое, што паказана ў кадры, і ставяць пад сумнеў мастацкую вартасць будучага фільма.
«На маю думку, фільмы гэтага жанру цяпер не будуць успрымацца гледачом. Мы штодня бачым не выдуманыя, а рэальныя гісторыі, гэтым забітыя ўсе навінавыя стужкі. Дакументалкі, нават блогеры ўспрымаюцца лепш. Таму што гэта рэальнае. Магчыма, праз 2-3 гады пасля заканчэння вайны хопіць сіл», — дзеліцца карыстальнік твітара.
«Тое, што я ўбачыў у трэйлеры, не заходзіць, таму што гульня акцёраў, агучка так сабе, на 3 балы. Гэта проста маё меркаванне. Вядома, што ўвесь фільм не бачыў, але мне чамусьці думаецца, што менавіта такое ў Расіі здымалі пра Асецію і пра Крым з Данбасам…» — піша яшчэ адзін чалавек. Заўвагі да гульні акцёраў і гуку ёсць і ў іншых, хто паглядзеў трэйлер.
«Нагадала серыялы на НТБ пра ментоў і бандытаў», — абмяркоўваюць людзі.
«Мне падабаецца ідэя гэтага», — не згодны з імі адзін з гледачоў.
Вячаслаў Сікора — акцёр і рэжысёр з Магілёўшчыны. У Шчучыне ён развіваў тэатральную і кінастудыю.
У 2014-м здымаў дакументалку пра Майдан ва Украіне.
Праз пагрозу пераследу пасля выбараў-2020 ён пакінуў Беларусь. Летась на Сікору завялі крыміналкі за распальванне варажнечы, паклёп і абразу ўлады і абвясцілі ў міжнародны вышук.
«Яна забрала дзяцей і вярнулася ў Мінск»: гісторыя беларуса, які эміграваў у Барселону з сям'ёй, а застаўся адзін18
Каментары