Лукашэнка: Калі абрынецца Расія, то пад яе абломкамі і наша месца
Лукашэнка падчас выступлення на саміце АДКБ гаварыў пра перспектывы арганізацыі і сярод іншага падзяліўся сваімі прагнозамі на будучыню.
Палітык адзначыў, што ў апошні час у СМІ развіваецца тэзіс аб тым, што жыццё і лёс АДКБ залежаць ад зыходу вайны ва Украіне. Маўляў, калі Расія пераможа, то АДКБ будзе жыць, а без Расіі арганізацыя нежыццяздольная.
Лукашэнка не толькі не стаў аспрэчваць гэта сцвярджэнне, а фактычна з ім салідарызаваўся:
«Адчуваю, што мы прыйшлі да адзінага меркавання, што калі, не дай бог, абрынецца Расія, то пад гэтымі абломкамі наша месца».
«Не павінна быць нават такіх размоў. Мы не збіраемся з ваенна-палітычнай арэны сыходзіць. АДКБ будзе існаваць, і ніхто нідзе не абрынецца. Але адзінства нам трэба», — дадаў Лукашэнка.
Варта адзначыць, што ў расійскую вайну ніхто з кіраўнікоў краін, што ўваходзяць у АДКБ, так глыбока, як Лукашэнка, не заангажаваўся нават і блізка, таму параза Расіі пакідае ім немалую прастору для манеўравання. Таму Лукашэнка, абагульняючы, гаварыў перадусім пра сябе.
Каментары