«Масква, Кіеў, Мінск — гэта тры братэрскія сястры». Пра што казаў у сваіх выступленнях прапагандыст Шчокін
Памёр лукашэнкаўскі прапагандыст Мікалай Шчокін. Яму было 49 гадоў. У дзяржаўных медыя ён выступаў рэгулярна: расказваў, як Беларусь адыграла першую скрыпку ў геапалітыцы, што наступны ў чарзе на дэнацыфікацыю — Еўрасаюз, а Германія багата жыве дзякуючы Расіі. Прыводзім яго цытаты.
Мікалай Шчокін — выпускнік гістарычнага факультэта Беларускага дзяржаўнага ўніверсітэта. Ён скончыў аспірантуру факультэта філасофіі і сацыяльных навук БДУ. Быў кандыдатам філасофскіх навук і дацэнтам.
«Самы папулярны лідар на планеце»
Да Мікалая Шчокіна звярталіся, калі трэба было адзначыць палітыку Лукашэнкі, якога ён лічыў «адным з самых запатрабаваных і папулярных лідараў на планеце», ці зганіць Захад.
«Будзем шчырымі, сёння Аляксандр Лукашэнка з'яўляецца адным з самых папулярных кіраўнікоў дзяржаў. Да яго прыслухоўваюцца тыя, хто сапраўды разумее, што без нашай краіны і якасцей сапраўднага палітычнага лідара немагчыма захаваць мір у рэгіёне», — нахвальваў Лукашэнку прапагандыст.
«Сёння мір на мяжы холаду і голаду»
«Пры гэтым ніводны беларус не адчуў дыскамфорт, ушчамленне сваіх спажывецкіх правоў і свабоды выбару, — даводзіў ён. — Тыя, хто хоча працаваць у краіне, павінны дакладна ведаць: усе без выключэння абавязаны працаваць на беларускі народ. Тыя, хто спалохаўся адказнасці або паддаўся санкцыйнаму шантажу, гэта значыць выявілі маладушнасць, самі абралі свой шлях — і нам з імі не па дарозе».
«Германія жыла добра за наш кошт»
Мікалай Шчокін вінаваціў ЗША ў тым, што яны «робяць усё, каб падарваць бяспеку ў Еўропе».
«Сітуацыя ва Украіне — гэта ўсяго толькі чарговы этап у рэалізацыі планаў ЗША, — пераконваў ён. — Аднак мы павінны разумець: незалежна ад таго, якая дзяржава ў бліжэйшы час узнікне на нашых паўднёвых межах, пытанні бяспекі для нас стануць яшчэ больш вострымі».
«Праблемы вялікія з Прыбалтыкай, Польшчай. Вы паглядзіце, што дзеецца. Блакуюць Калінінградскую вобласць. Заблакавалі практычна ўсе нашы межы», — далей абураўся ён.
«Калі Расія давала па такіх нізкіх цэнах газ, што Германія сама перапрадавала ўтрая больш у дзясяткі краін, дык яны і жылі добра. За наш кошт», — даводзіў ён.
«Масква, Кіеў, Мінск — гэта тры братэрскія сястры»
У адным з каментароў Шчокін абураўся, што кіраўніцтва Кіева анулявала дамову аб пабрацімстве з Мінскам.
«Тры славянскія гарады Масква, Кіеў, Мінск — гэта тры братэрскія сястры. Цяперашняе рашэнне бянтэжыць і не надае сілы нашым славянскім народам. Мінск заўжды быў на баку міру. Заўжды дапамагаў нашым украінскім братам», — даводзіў Шчокін.
«Пасля таго, як сыдзе Зяленскі ў нябыт і будзе праведзена дэмілітарызацыя ўсёй тэрыторыі, Саюзнай дзяржаве давядзецца брацца за другую працу. Яна будзе доўгай. Дэнацыфікацыю Еўрапейскага саюза, — прадракаў Шчокін. —
Але гэты фашызм, так званы дэмакратычны… Трэба выпальваць калёным жалезам. Неабавязкова, каб рускія танкі стаялі ў Берліне, хаця можа і да гэтага дойдзе… Беларусь і Расія знойдуць універсальную форму, каторая з найменшымі стратамі зможа правесці гэту дэнацыфікацыю Еўропы і прывесці ў нармальную адпаведнасць еўрапейскія народы. Да дэмакратыі іх прывесці».
«Першую скрыпку адыграла Беларусь»
Шчокін хваліў Расію і Кітай, «якія практычна зламалі аднапалярны свет, і першую скрыпку тут адыграла Беларусь».
«Цяпер другая фаза надыходзіць, каб Еўропа і Захад у цэлым зразумелі сваю ролю і месца, звыкліся з той думкай, што яны не ад бога, яны такія, як усе. І тут дужа важнае месца Беларусі. Мы як сувязнае звяно».
Каментары