«У беларускай палітыцы паняццямі «агент КДБ» ці «агент Масквы» моцна злоўжываюць»
Журналіст радыё «Свабода» Дзмітрый Гурневіч выказаўся ў фэйсбуку пра затрыманага ўчора палітыка Андрэя Дзмітрыева, які ў нашым грамадстве ўжо больш за дзясятак гадоў мае вельмі неадназначную — хоць для многіх цалкам адназначную — рэпутацыю. Ці слушна на яго чапляць ідэалагічныя цэтлікі? І ўвогуле ці слушна іх чапляць?
Андрэй Дзмітрыеў быў адной з першых ахвяр «пакаяльных відэа» і атрымаў за гэта ад многіх кляймо здрадніка. Сёння ГУБАЗіК прадукуе такія відэа ў прамысловых маштабах і разумныя людзі ведаюць, што не варта звяртаць на гэта асаблівай увагі, бо ў палоне галоўнае выжыць і не нашкодзіць іншым.
У 2010 годзе гэта было навінкай, таму многія, асабліва з палітычнай тусоўкі, не паверылі Дзмітрыеву, што пайсці на гэта ён мусіў выключна таму, што сілавікі шантажавалі яго свабодай блізкага чалавека.
Але кагосьці гэта не пераканала, а камусьці не спадабалася форма яго апраўдання. І з тых часоў да яго прычапілася латка «агента КДБ».
Але не толькі за гэта, яшчэ і за форму вядзення палітыкі.
Палітыкаў я падзяляю на тры гатункі:
1) тыя, хто адчувае рэальнасць, працэсы, настроі людзей і спрабуе ісці ў нагу з грамадствам, не абганяючы яго, але спрабуючы хітра з ім працаваць;
2) тыя, хто адчувае рэальнасць, працэсы, настроі людзей і спрабуе іх змяніць, ідучы насуперак настроям;
3) тыя, хто жыве ў ілюзіі і не разумее ані працэсаў, ані настрояў людзей, і нічога не робіць.
Як журналіст я назіраю за Дзмітрыевым шмат гадоў і адношу яго, бясспрэчна, да першых. (Каб пазбегнуць непатрэбнай дыскусіі, адразу скажу, што ён не мой кандыдат, але я спрабую паглядзець на сітуацыю аб'ектыўна).
Шмат каго бесіць, што ён удзельнічае ў выбарах, піша заявы ў сельсаветы і райвыканкамы, ходзіць туды з людзьмі на прыёмы з чыноўнікамі, да апошняга карыстаўся легальным полем дзейнасці (і не асабліва, дарэчы, з гэтым піярыўся).
Для адных гэтага хапае, каб лічыць яго агентам, бо ён дзейнічае ў рэчышчы сістэмы. Але для Дзмітрыева гэта адзіная форма працы, якую ён лічыць эфектыўнай. Таму ён спакойна размаўляе і з ябацькамі, і з аматарамі Пуціна, бо гэта таксама беларусы, а ў будучыні — патэнцыйныя выбарцы.
І ў беларускай палітыцы такіх палітыкаў будзе яшчэ вельмі шмат, бо гэта проста паспяховая паліттэхналогія. (Роўна з такой ішоў на выбары Віктар Бабарыка).
Хто быў, ёсць агентам ці яшчэ ім стане, спадзяюся, мы некалі даведаемся дзякуючы архівам і іншым дакументам. Нехта, імаверна, прызнаецца і сам. Але
сёння ў беларускай палітыцы паняццямі «агент КДБ» ці «агент Масквы» моцна злоўжываюць. Ім становіцца ледзь не кожны, з кім не пагаджаецца іншы бок.
Гэта ўжо і мем, і з'ява, роўная «закону Годвіна», якая прадугледжвае бессэнсоўнасць далейшай дыскусіі, калі апанент сягае ў ёй да аргумента пра Гітлера і нацызм.
Чытайце таксама:
Затрымалі Андрэя Дзмітрыева
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2
Каментары
Бо ўсім бачна, якія турботы праходзіць беларуская гісторыя, мова і культура ў апошнія дзесяцігоддзі. Зьнішчаюць.
Хто гэта зрабіў? Калі не агэнты ФСБ, Крамля ці Расеі, то людзі, якія аўтаматычна імі зьяўляюцца. Бо зараз мы маем 90% насельніцтва, якое размаўляе расейскай, глядзіць расейскае ТБ, глядзіць расейскі юТуб, слухае расейскую музыку.
Што будзе, пры другой ці трэцяй, ці чацьвёртай ітэрацыі спробы пашырэньня Расейскай імпэрыі праз 5, 15 ці 50 гадоў? Мэнтальна і культурна расейскія беларусы будуць на баку Беларусі? Спрэчна.
Прыемная навіна - кожны можа зрабіць крок на захаваньне нацыі. Пішыце ў сацсетках на роднай мове, рабіце пераводы грошаў актыўным беларускамоўным артыстам і блогерам, распаўсюджвайце гісторыю і культуру.
Наша вайна яшчэ наперадзе, але рыхтавацца ўжо трэба.
Жыве Беларусь!(Памірае КДБ!)