Да 28 «квадратаў». Якія мікракватэры прадаюць у Мінску 4

Фота: kufar.by

«Ідэальны варыянт для інвестыцый»

Самая маленькая з выстаўленых на продаж кватэр у Мінску мае агульную плошчу 20,6 м². Месціцца яна на другім паверсе пяціпавярховага дома 1974 года пабудовы па адрасе Партызанскі праспект, 29А. Мікракватэру з еўрарамонтам ацэньваюць у 37 500$, або 1820 даляраў за «квадрат». 

Фота: kufar.by

Жылы пакой мае 11,5 м², кухня амаль 5. Як бачна на фота, на кухні адначасова могуць есці толькі два чалавекі і то пры ўмове, што адзін з іх будзе сядзець за сталом, а другі за барнай стойкай. 

Фота: kufar.by

У памяшканні зроблены сучасны рамонт, жылы пакой мае даволі вялікае акно з выхадам на балкон. 

Санвузел цалкам адпавядае агульным памерам кватэры, там усё настолькі шчыльненька, што чалавеку з клаўстрафобіяй сюды лепей на заходзіць.

Фота: kufar.by

Прадаўцы апісваюць кватэру, як «ідэальны варыянт для інвестыцый», так як яна знаходзіцца ў цэнтральнай частцы сталіцы. 

Рамонт з часоў СССР

Крыху большую кватэру прадаюць па адрасе Багдановіча, 90. За аднапакаёўку на чацвёртым паверсе з агульнай плошчай 22 м² гаспадары хочуць атрымаць 38 000$, ці па 1727 даляраў за метр. 

Фота: kufar.by

У адрозненне ад папярэдняга варыянта, рамонт па ўсёй бачнасці рабіўся яшчэ пры саветах. 

Фота: kufar.by

«Перавага кватэры ў тым, што яна знаходзіцца ў выдатным месцы і дом пасля капітальнага рамонту», — гаворыцца ў апісанні. 

2644 даляры за метр

На палову «квадрата» прасторней і на 21 500$ даражэй прадаюць сучасную кватэру-студыю па адрасе Еўфрасінні Полацкай, 5. Кватэра агульнай плошчай 22,5 м² месціцца на дзясятым паверсе дома 2017 года пабудовы. Просяць за яе 59 500$, ці па 2 644 даляры за метр.

Фота: kufar.by

«Прадаецца сучасная кватэра з панарамным відам, мэбляй, тэхнікай і кандыцыянерам», — гаворыцца ў апісанні да аб'екта.

Столі з касітонамі

У 47 тысяч даляраў ацэнена аднапакаёўка на Нёманскай, 3. Цана «квадрата» — 1900$. Кватэра месціцца на другім паверсе 12-павярховага дома 2012 года пабудовы. Агульная плошча жытла 24,7 м², ёсць невялікі балкон. 

Рамонт апісаны як «добры». На падлозе ляжыць лінолеум. На столі касітоны.

Фота: realt.by 

Кватэру прадаюць разам з мэбляй і тэхнікай, сярод якой пральная машына з вертыкальнай загрузкай, якая дапамагае эканоміць прастору. Прадавец адзначае, што пад домам ёсць падземны паркінг з вольнымі месцамі.

Непадалёк ад дома знаходзіцца парк «Сямейнае дрэва» і парк імя Уга Чавеса. 

Фота: realt.by 

Аднапакаёўка з дзіцячым закутком

Плошча наступнай кватэры — 26,5 м². Знаходзіцца яна на Партызанскім праспекце, 67. Аднапакаёўка месціцца на апошнім дзявятым паверсе цаглянага дома 1967 года пабудовы. 

Прадаўцы ацэньваюць кватэру ў 48 500 даляраў, ці 1830$ за м².

Фота: realt.by 

Плошча жылога пакоя 16,6 м². З дапамогай паліцы памяшканне падзелена на дарослую і дзіцячую зоны. 

У кватэры зроблены сучасны рамонт. Таксама ў 2018 годзе быў выкананы капітальны рамонт дома з заменай усіх камунікацый.

Фота: realt.by 

На невялічкай кухні ёсць два месцы за сталом. Там жа стаіць пральная машына.

Фота: realt.by 

Вокны кватэры выходзяць на парк. Сярод пераваг прадаўцы адзначаюць выгаднае геаграфічнае размяшчэнне дома: яго акружае парк ля станцыі метро «Партызанская».

Студыя з лоджыяй і кансьержам

Па адрасе Гурскага, 45 за 58 тысяч даляраў прадаюць сучасную кватэру-студыю з агульнай плошчай 27,8 м². Плошча асноўнага пакоя складае 16,5 м². 

Фота: realt.by 

У пакоі высокае акно, праз якое можна патрапіць на даволі прасторную лоджыю. «Квадрат» у кватэры каштуе 2086$.

Фота: realt.by 

У доме 2018 года пабудовы маецца кансьерж і відэадамафон. Побач з домам знаходзяцца школа, дзіцячы сад, ГЦ «Глоба».

Прадаўцы называюць гэтую кватэру ідэальным варыянтам для пражывання маладой пары і для здачы ў арэнду. 

Чытайце таксама: 

Стала вядома, якія дамы з'явяцца на месцы так і не дабудаванага ГЦ «Гулівер» 

Высокія столі, балкон з калонамі і бамбасховішча ў падвале. Якія кватэры прадаюць у цэнтры Мінска

Якія дамы недалёка ад Мінска можна купіць па цане аднапакаёўкі

Nashaniva.com