«Федэрацыя ператварылася ў сакрэтную арганізацыю з абмежаваным узроўнем допуску». Спартыўныя чыноўнікі шэсць гадзін думалі, што рабіць з футболам
Сёння шэсць гадзін без перапынку ішла калегія Міністэрства спорту і турызму, на якой абмяркоўваліся праблемы айчыннага футбола. Галіна цяпер знаходзіцца ў глыбокім крызісе, што мусяць прызнаваць і яе функцыянеры, шукаючы выхад з сітуацыі. Але выхад ім бачыцца, як звычайна, ва ўзмацненні адміністрацыйнага кантролю і «навядзенні парадку» без змены самой сістэмы.
Кіраўнік БФФ Уладзімір Базанаў, паводле сведчання аднаго з прысутных, звярнуў увагу на тое, што беларускія клубы сталі кепска выступаць у еўракубках, але абвінаваціў у гэтым слабую кампетэнцыю трэнераў. Іншыя выступоўцы гаварылі пра росквіт кумаўства і панібрацтва. Міністр спорту і турызму Сяргей Кавальчук асабліва звярнуў увагу ў якасці прыкладу на нядаўнюю сітуацыю з салігорскім «Шахцёрам».
Следчы камітэт завёў крымінальную справу супраць прадстаўніка салігорскага «Шахцёра» за дагаворны матч
Трэнер Анатоль Юрэвіч, прызначаны цяпер трэнерам-куратарам усяго беларускага футбола, звяртаў увагу на на тое, што
«ў нас усё заўсёды прыгожа на словах і ў справаздачах, а федэрацыя, якая нібыта як грамадскае аб'яднанне, ператварылася ў сакрэтную арганізацыю з абмежаваным узроўнем допуску».
Характэрна, што і гэтае пасяджэнне праходзіла без журналістаў, а тым, хто на ім прысутнічаў, забаранялася браць з сабой тэлефоны і дыктафоны.
У выніку міністр спорту Сяргей Кавальчук акрэсліў ажно 16 напрамкаў дзеяння для паляпшэння сітуацыі, якія
мусяць быць рэалізаваныя ў найкарацейшыя тэрміны — самае позняе да канца года, але ёсць задачы і на тры тыдні, і на тры месяцы.
Паводле міністра, да студзеня наступнага года трэба правесці абавязковую акрэдытацыю ўсіх асоб, якія працуюць у беларускім футболе, без акрэдытацыі нікога да працы ў ім дапускаць не будуць.
Усіх кіраўнікоў, якія працуюць у клубах, можна будзе прызначаць толькі «на падставе рашэння Рады Мінспорта і пасля вывучэння маральных і прафесійных якасцяў прэтэндэнта».
У той жа час некалькі разоў прагучала і слова «дыялог»: ён павінен, на думку Кавальчука, быць забяспечаны паміж федэрацыяй і клубамі, а таксама павінен ісці «калектыўны дыялог» на месцах, каб атрымаць зваротную сувязь ад заўзятараў і футбольнай грамадскасці.
Некалькі кірункаў тычылася паляпшэння сітуацыі з футбольнай адукацыяй. Так, клубам прадпісваецца аднавіць і палепшыць працу клубных акадэмій, таксама павінна быць праведзена дадатковае навучанне трэнераў. Мусіць паляпшацца і маркетынг, і праводзіцца маніторынг інфраструктуры, яе мадэрнізацыя і г. д.
Нікуды ў сучасных умовах і без ідэалагічнай работы, прытым як з дарослымі, так і з дзецьмі. Для гэтага трэба «арганізоўваць патрыятычныя куткі, культываваць і развіваць у моладзі прыстойнасць, дабрыню і павагу да старэйшых».
Трэба думаць, што з гэтым звязана і рашэнне, што на формах клубаў з Вышэйшай і Першай ліг павінна абавязкова прысутнічаць дзяржаўная сімволіка.
У цэлым можна сказаць, што не ўсе выказаныя міністрам прапановы недарэчныя, але яны відавочна не могуць быць рэалізаваныя ў такія сціслыя тэрміны, як тыдні, месяцы і год.
Дырэктыўнымі метадамі, на якія зноў ускладаюцца асноўныя спадзяванні, такія праблемы не вырашаюцца, а новую сістэму трэба пры наяўнасці добрай волі паслядоўна выбудоўваць гадамі. Іншая рэч — калі мэта, каб усё было «прыгожа на словах і ў справаздачах».
Таксама з пераказу таго, што адбывалася на мерапрыемстве, не зразумела, ці падымалася ўвогуле праблема агульнай сітуацыі ў краіне і ў свеце, а перадусім тое, што беларускі футбол ужо цяпер знаходзіцца ў паўізаляцыі, а неўзабаве цалкам верагодна можа аказацца ў ізаляцыі поўнай. І што тая ж сітуацыя ў краіне несумненна аказвае ўплыў на змяншэнне цікавасці заўзятараў да айчыннага футбола. А гэта дакладна ніякімі дырэктывамі Кавальчука не выправіш.
Каментары