«Fiederacyja pieratvaryłasia ŭ sakretnuju arhanizacyju z abmiežavanym uzroŭniem dopusku». Spartyŭnyja čynoŭniki šeść hadzin dumali, što rabić z futbołam

Kiraŭnik BFF Uładzimir Bazanaŭ, pavodle śviedčańnia adnaho z prysutnych, źviarnuŭ uvahu na toje, što biełaruskija kłuby stali kiepska vystupać u jeŭrakubkach, ale abvinavaciŭ u hetym słabuju kampietencyju trenieraŭ. Inšyja vystupoŭcy havaryli pra roskvit kumaŭstva i panibractva. Ministr sportu i turyzmu Siarhiej Kavalčuk asabliva źviarnuŭ uvahu ŭ jakaści prykładu na niadaŭniuju situacyju z salihorskim «Šachcioram».

Śledčy kamitet zavioŭ kryminalnuju spravu suprać pradstaŭnika salihorskaha «Šachciora» za dahavorny matč

Trenier Anatol Jurevič, pryznačany ciapier trenieram-kurataram usiaho biełaruskaha futboła, źviartaŭ uvahu na na toje, što

«ŭ nas usio zaŭsiody pryhoža na słovach i ŭ spravazdačach, a fiederacyja, jakaja nibyta jak hramadskaje abjadnańnie, pieratvaryłasia ŭ sakretnuju arhanizacyju z abmiežavanym uzroŭniem dopusku».

Charakterna, što i hetaje pasiadžeńnie prachodziła biez žurnalistaŭ, a tym, chto na im prysutničaŭ, zabaraniałasia brać z saboj telefony i dyktafony. 

U vyniku ministr sportu Siarhiej Kavalčuk akreśliŭ ažno 16 napramkaŭ dziejańnia dla palapšeńnia situacyi, jakija

musiać być realizavanyja ŭ najkaraciejšyja terminy — samaje poźniaje da kanca hoda, ale jość zadačy i na try tydni, i na try miesiacy. 

Pavodle ministra, da studzienia nastupnaha hoda treba pravieści abaviazkovuju akredytacyju ŭsich asob, jakija pracujuć u biełaruskim futbole, biez akredytacyi nikoha da pracy ŭ im dapuskać nie buduć.

Usich kiraŭnikoŭ, jakija pracujuć u kłubach, možna budzie pryznačać tolki «na padstavie rašeńnia Rady Minsporta i paśla vyvučeńnia maralnych i prafiesijnych jakaściaŭ pretendenta».

U toj ža čas niekalki razoŭ prahučała i słova «dyjałoh»: jon pavinien, na dumku Kavalčuka, być zabiaśpiečany pamiž fiederacyjaj i kłubami, a taksama pavinien iści «kalektyŭny dyjałoh» na miescach, kab atrymać zvarotnuju suviaź ad zaŭziataraŭ i futbolnaj hramadskaści.

Niekalki kirunkaŭ tyčyłasia palapšeńnia situacyi z futbolnaj adukacyjaj. Tak, kłubam pradpisvajecca adnavić i palepšyć pracu kłubnych akademij, taksama pavinna być praviedziena dadatkovaje navučańnie trenieraŭ. Musić palapšacca i markietynh, i pravodzicca manitorynh infrastruktury, jaje madernizacyja i h. d.

Nikudy ŭ sučasnych umovach i bieź ideałahičnaj raboty, prytym jak z darosłymi, tak i ź dziećmi. Dla hetaha treba «arhanizoŭvać patryjatyčnyja kutki, kultyvavać i raźvivać u moładzi prystojnaść, dabryniu i pavahu da starejšych». 

Treba dumać, što z hetym źviazana i rašeńnie, što na formach kłubaŭ z Vyšejšaj i Pieršaj lih pavinna abaviazkova prysutničać dziaržaŭnaja simvolika. 

U cełym možna skazać, što nie ŭsie vykazanyja ministram prapanovy niedarečnyja, ale jany vidavočna nie mohuć być realizavanyja ŭ takija ścisłyja terminy, jak tydni, miesiacy i hod.

Dyrektyŭnymi mietadami, na jakija znoŭ uskładajucca asnoŭnyja spadziavańni, takija prablemy nie vyrašajucca, a novuju sistemu treba pry najaŭnaści dobraj voli paśladoŭna vybudoŭvać hadami. Inšaja reč — kali meta, kab usio było «pryhoža na słovach i ŭ spravazdačach».

Taksama ź pierakazu taho, što adbyvałasia na mierapryjemstvie, nie zrazumieła, ci padymałasia ŭvohule prablema ahulnaj situacyi ŭ krainie i ŭ śviecie, a pieradusim toje, što biełaruski futboł užo ciapier znachodzicca ŭ paŭizalacyi, a nieŭzabavie całkam vierahodna moža akazacca ŭ izalacyi poŭnaj. I što taja ž situacyja ŭ krainie niesumnienna akazvaje ŭpłyŭ na źmianšeńnie cikavaści zaŭziataraŭ da ajčynnaha futboła. A heta dakładna nijakimi dyrektyvami Kavalčuka nie vypraviš.

• 4
• 0
• 19
• 22
• 0
• 4
• 6
• 0