Адміністратару суполкі «За адзіную дзяржаўную мову ў Беларусі» далі тры гады калоніі
У Гомельскім абласным судзе 13 лютага да трох гадоў калоніі ва ўмовах узмоцненага рэжыму асудзілі навуковага супрацоўніка Уладзіміра Буцькаўца.
Яго абвінавацілі ў адміністраванні суполкі ва ўкантакце «За адзіную дзяржаўную мову ў Беларусі!» і асудзілі паводле ч. 1 арт. 361-1 (стварэнне экстрэмісцкага фармавання), піша «Гомельская вясна». Прысуд вынес суддзя Руслан Царук.
Уладзіміра Буцькаўца затрымалі 5 верасня 2022 года і прызначылі сем сутак арышту паводле арт. 19.11 КаАП за «распаўсюджванне экстрэмісцкіх матэрыялаў». 14 верасня на адным з праўладных тэлеграм-каналаў з'явілася відэа, на якім бачна, як міліцыянты з прымяненнем сілы затрымліваюць мужчыну, а далей ён прызнаецца, што мадэраваў і выстаўляў навіны пра беларускую мову ў пабліку, які нядаўна абвясцілі «экстрэмісцкім фармаваннем».
5 жніўня інфармацыйную прадукцыю суполкі «За адзіную дзяржаўную мову Беларусі!» прызналі «экстрэмісцкімі матэрыяламі», 18 жніўня — «экстрэмісцкім фармаваннем».
Што вядома пра Уладзіміра?
У лютым 2021 годзе Уладзімір Буцькавец звяртаўся ў Следчы камітэт Гомеля з просьбай дапытаць яго ў якасці сведкі па справе праваабаронцы Леаніда Судаленкі, да якога ён неаднаразова звяртаўся па прававую дапамогу. Гэтае жаданне ў яго ўзнікла пасля таго, як Уладзіміру адмовілі ў хадайніцтве ў СК, каб праваабаронцу адпусцілі да суда дадому пад яго асабістае паручальніцтва. У СК Буцькаўцу адказалі, што ён не ўдзельнік працэсу і не можа ні пра што хадайнічаць.
Летам 2022 года Уладзімір быў звольнены з працы як «палітычна нядобранадзейны». Ён спрабаваў адстойваць сваю пазіцыю ў межах заканадаўства, складаў шматлікія звароты і скаргі, але безвынікова.
Падтрымаць Уладзіміра можна лістамі, пасылкамі і грашовымі пераводамі па адрасе: СІЗА-3, вул. Кніжная, 1А, г. Гомель, 246003, Буцькавец Уладзімір Васільевіч.
Каментары