Генпракуратура Украіны абвінаваціла расійскіх салдат у згвалтаванні чатырохгадовай дзяўчынкі і яе маці на вачах у бацькі — Reuters
Reuters атрымала доступ да матэрыялаў украінскай Генпракуратуры. Там сабраныя сэксуальныя злачынствы, якія расійскія вайскоўцы 15-й асобнай мотастралковай брыгады здзейснілі ў чатырох дамах у Браварскім раёне недалёка ад сталіцы Кіева ў сакавіку 2022 года.
Следчыя абвінавацілі ў гвалце 12 вайскоўцаў 15-й асобнай мотастралковай брыгады.
Следства сцвярджае, што 13 сакавіка 2022 года расійскія салдаты ў адным з дамоў у Браварах Кіеўскай вобласці збілі мужчыну і прымусілі яго глядзець на згвалтаванне жонкі. Пасля гэтага двое салдат згвалцілі іх чатырохгадовую дачку.
Абвінавачаныя ў згвалтаванні дзяўчынкі былі снайперамі, 28 і 32 гадоў. Пракуратура называе імя толькі малодшага з іх — Яўген Чарнакніжны. Паводле пракуратуры, ён вярнуўся ў Расію. Другі мужчына загінуў.
Reuters змагло знайсці нумар Чарнакніжнага, на званок адказаў чалавек, які назваўся яго братам. Ён паведаміў, што Чарнакніжны памёр, і заплакаў. Пацвярджэння гэтай інфармацыі няма. Але пра гібель Чарнакніжнага ў красавіку 2022 года паведамляла выданне Orenday.
Пракуратура сцвярджае, што пасля няўдалай спробы захапіць Кіеў салдаты перайшлі да татальнага запалохвання мясцовага насельніцтва.
Так, па версіі следства, у гэты дзень салдаты 15-й асобнай мотастралковай брыгады збілі пажылую пару ў суседнім доме, згвалтавалі 41-гадовую цяжарную жанчыну і 17-гадовую дзяўчыну, а пасля здзейснілі групавое згвалтаванне 15-гадовай дзяўчыны і яе маці. Таксама яны здзяйснялі рабаванні.
Пракуратура заявіла, што ўсе пацярпелыя выжылі, ім аказаная псіхалагічная і медыцынская дапамога.
Генеральная пракуратура Украіны паведамляе, што расследуе больш чым 71 тысячу паведамленняў аб ваенных злачынствах, здзейсненых пасля пачатку вайны.
Цяпер чытаюць
«Беларусь перадусім». Што вядома пра 23‑гадовага афіцэра спецназа, якога асудзілі на 19 гадоў за «здраду дзяржаве»18
Каментары