Hienprakuratura Ukrainy abvinavaciła rasijskich sałdat u zhvałtavańni čatyrochhadovaj dziaŭčynki i jaje maci na vačach u baćki — Reuters
Reuters atrymała dostup da materyjałaŭ ukrainskaj Hienprakuratury. Tam sabranyja seksualnyja złačynstvy, jakija rasijskija vajskoŭcy 15-j asobnaj motastrałkovaj bryhady ździejśnili ŭ čatyroch damach u Bravarskim rajonie niedaloka ad stalicy Kijeva ŭ sakaviku 2022 hoda.
Śledčyja abvinavacili ŭ hvałcie 12 vajskoŭcaŭ 15-j asobnaj motastrałkovaj bryhady.
Śledstva śćviardžaje, što 13 sakavika 2022 hoda rasijskija sałdaty ŭ adnym z damoŭ u Bravarach Kijeŭskaj vobłaści źbili mužčynu i prymusili jaho hladzieć na zhvałtavańnie žonki. Paśla hetaha dvoje sałdat zhvałcili ich čatyrochhadovuju dačku.
Abvinavačanyja ŭ zhvałtavańni dziaŭčynki byli snajpierami, 28 i 32 hadoŭ. Prakuratura nazyvaje imia tolki małodšaha ź ich — Jaŭhien Čarnaknižny. Pavodle prakuratury, jon viarnuŭsia ŭ Rasiju. Druhi mužčyna zahinuŭ.
Reuters zmahło znajści numar Čarnaknižnaha, na zvanok adkazaŭ čałaviek, jaki nazvaŭsia jaho bratam. Jon paviedamiŭ, što Čarnaknižny pamior, i zapłakaŭ. Paćviardžeńnia hetaj infarmacyi niama. Ale pra hibiel Čarnaknižnaha ŭ krasaviku 2022 hoda paviedamlała vydańnie Orenday.
Prakuratura śćviardžaje, što paśla niaŭdałaj sproby zachapić Kijeŭ sałdaty pierajšli da tatalnaha zapałochvańnia miascovaha nasielnictva.
Tak, pa viersii śledstva, u hety dzień sałdaty 15-j asobnaj motastrałkovaj bryhady źbili pažyłuju paru ŭ susiednim domie, zhvałtavali 41-hadovuju ciažarnuju žančynu i 17-hadovuju dziaŭčynu, a paśla ździejśnili hrupavoje zhvałtavańnie 15-hadovaj dziaŭčyny i jaje maci. Taksama jany ździajśniali rabavańni.
Prakuratura zajaviła, što ŭsie paciarpiełyja vyžyli, im akazanaja psichałahičnaja i miedycynskaja dapamoha.
Hienieralnaja prakuratura Ukrainy paviedamlaje, što rasśleduje bolš čym 71 tysiaču paviedamleńniaŭ ab vajennych złačynstvach, ździejśnienych paśla pačatku vajny.
Akaŭnt Kabančuka ŭzłamali — ale ci biełaruskija śpiecsłužby?3
Kamientary