Больш за паўтара месяца ад палітзняволенага Ігара Лосіка няма лістоў, да яго не дапускаюць адвакатаў.
Журналіст «Свабоды», палітвязень Ігар Лосік знаходзіцца за кратамі з 25 чэрвеня 2020 года, у снежні 2021 яму прысудзілі 15 гадоў пазбаўлення волі.
У кастрычніку 2022 года ўлады Беларусі арыштавалі жонку Ігара Дар’ю, якую абвінавацілі ў інтэрв'ю тэлеканалу «Белсат» пра Ігара. У лютым 2023 года Лосік у наваполацкай калоніі атрымаў спагнанне, праз якое вязню скасавалі доўгатэрміновае спатканне з бацькамі. Яно павінна было адбыцца пры канцы сакавіка.
3 красавіка новая адвакатка палітвязня ездзіла ў наваполацкую калонію, аднак яе не пусцілі да падабароннага. Прычынай у адміністрацыі назвалі тое, што сам Ігар не напісаў заяву на сустрэчу з адвакатам. Абаронца напісала пісьмовы запыт на спатканне са сваім падабаронным без ягонай заявы, аднак просьбу не задаволілі. Папярэдняя спроба адваката трапіць да Ігара адбылася 10 сакавіка і мела такі ж вынік.
5 красавіка «Свабодзе» стала вядома, што Ігара Лосіка зноў змясцілі ў ШІЗА, другі раз запар. На які тэрмін і па якой прычыне, пакуль невядома.
Ранейшага адваката Ігара Лосіка Арцёма Сям’янава затрымалі ў Мінску 20 сакавіка. Сям’янаву прысудзілі 15 сутак нібыта за непадпарадкаванне міліцыі і змясцілі ў ЦІП. 4 красавіка яго перазатрымалі на Акрэсціна і прызначылі яшчэ 15 сутак арышту.
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч15
Каментары