Здымак носіць ілюстрацыйны характар. Фота: bundespolizei.de
Як паведамляе інтэрнэт-выданне Welt са спасылкай на атрыманыя ад федэральнай паліцыі звесткі, на ўчастку мяжы Германіі з Польшчай у красавіку колькасць выяўленых нелегальных уездаў вырасла амаль удвая. Паказчык склаў 2427 выпадкаў у параўнанні з 1584 у сакавіку. У зімовыя месяцы іх было значна менш — 1389 у студзені і 1040 у лютым.
У артыкуле цытуецца паведамленне польскіх улад:
«Усё часцей мы назіраем агрэсіўныя паводзіны замежнікаў, якія нападаюць на памежнікаў, таму што хочуць любой цаной дабрацца да пункта прызначэння — праз Польшчу ў Заходнюю Еўропу». Рашучасць мігрантаў расце і «базуецца не на жаданні атрымаць абарону ў Польшчы, а на тым, каб як мага хутчэй трапіць у Заходнюю Еўропу».
Пры гэтым беларускія вайскоўцы «пастаянна садзейнічаюць незаконнаму перасячэнню мяжы і забяспечваюць наяўнасць прылад для яе перасячэння». Паводле памежнай паліцыі Польшчы, сярод затрыманых шмат сірыйцаў і афганцаў, а таксама грамадзян іншых арабскіх і афрыканскіх краін. Многія з затрыманых маюць расійскія турыстычныя або іншыя візы.
Аўтар згадвае, што іншае нямецкае выданне Bild са спасылкай на канфідэнцыйны дакумент федэральнай паліцыі паведаміла, што ў паловы арыштаваных на ўсходняй мяжы Германіі ў сакавіку былі знойдзены доказы таго, што яны патрапілі ў ЕС праз Беларусь.
«Неправамернае выкарыстанне расійскіх віз для паездак праз Расійскую Федэрацыю ў Беларусь і далей у ЕС застаецца нязменным», — гаворыцца ў дакуменце. У сацсетках працягваюць рэкламаваць маршрут праз Расійскую Федэрацыю і Беларусь.
Выданне са спасылкай на федэральную паліцыю звяртае ўвагу, што ў красавіку на польскім участку мяжы было выяўлена значна больш несанкцыянаваных уездаў, чым на аўстрыйскім (1298). Гэта тлумачыцца тым, што мяжа з Аўстрыяй кантралюецца больш строга, чым іншыя, з-за стацыянарнага памежнага кантролю, які ў Германіі існуе толькі там.
Аўтар артыкула нагадвае, што на саміце па праблемах бежанцаў, які адбыўся 10 мая 2023 года, канцлер Олаф Шольц і кіраўнікі ўрадаў 16-ці федэральных зямель дамовіліся пашырыць стацыянарны памежны кантроль. У дакуменце адзначалася:
«У залежнасці ад сітуацыі федэральны ўрад таксама ўвядзе канцэпцыю памежнай бяспекі, якая існуе ў дачыненні да Аўстрыі, на іншых унутраных межах Германіі пасля кансультацый з адпаведнымі федэральнымі землямі Федэратыўнай Рэспублікі Германія».
У артыкуле адзначаецца, што цяпер міністры ўнутраных спраў Брандэнбурга і Саксоніі, якія мяжуюць з Польшчай, патрабуюць ад федэральнага міністра ўнутраных спраў неадкладна ўвесці стацыянарны кантроль на мяжы з Польшчай.
Аўтар заўважае, што магчымасць адмовы ва ўездзе ў Германію можа быць рэалізаваная толькі пасля паведамлення аб гэтым у адпаведныя ўстановы ЕС з пазначэннем прычыны, чаму ўводзіцца такая строгая мера памежнага кантролю на ўнутраных межах краін — членаў Шэнгенскай прасторы. У іншым выпадку памежны кантроль будзе не больш чым статыстычным улікам незаконных перасячэнняў мяжы.
Аўтар адзначае, што чакаць сур'ёзнага супраціву з боку Бруселя не трэба, бо Францыя 1 мая абвясціла аб увядзенні стацыянарнага кантролю на ўсіх дзяржаўных межах.
Чытайце яшчэ:
Беларуса затрымалі на нямецка-польскай мяжы за дапамогу нелегальным мігрантам
Літва папрасіла ў Еўрасаюза дадатковыя сродкі для ўмацавання мяжы з Беларуссю
Адновіцца авіязлучэнне з Іранам. Ці рызыкне Лукашэнка паўтарыць атаку мігрантамі?
