У 43-ю гадавіну выхаду легендарнай гульні Pac-Man кампанія Lego выпускае канструктар, прысвечаны класічнай аркадзе.
Lego анансавала новы набор, заснаваны на класічнай аркаднай гульні 1980-х Pac-Man. Набор з 2650 частак узнаўляе від аркаднага аўтамата Pac-Man і ідзе ў камплекце з падсветкай для манет, чатырохбаковым джойсцікам і непасрэдна гульнёй (праўда, у механічным варыянце).
Збоку шафы ёсць рукаятка, якую можна круціць для перамяшчэння персанажаў па лабірынце гульні. Да таго ж у камплекце ёсць дыярама, якая адлюстроўвае і міні-версію аркаднага аўтамата (то-бок міні-аўтамат унутры міні-аўтамата).
Выпуск канструктара Pac-Man адбываецца праз 43 гады пасля таго, як кампанія Bandai Namco (тады вядомая як Namco) упершыню пратэставала гульню ў 1980 годзе, распавядае The Verge. Pac-Man лічыцца адной з самых папулярных аркадных гульняў усіх часоў: так, у прэс-рэлізе Lego адзначаецца, што за сем гадоў пасля першапачатковага выпуску гульня была ўсталяваная на 293822 аркадных аўтаматах.
Набор Pac-Man будзе каштаваць 269,99 даляра і паступіць у продаж 4 чэрвеня. Дарэчы, столькі ж каштаваў і іншы набор, які выйшаў нядаўна і быў прысвечаны класічнай гульнявой прыстаўцы NES ад Nintendo. Гэты набор з'яўляецца апошнім у серыі, прысвечанай відэагульням, якая ўключала таксама серыю інтэрактыўных канструктараў Super Mario.
Цяпер чытаюць
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка4
Каментары