Фота: Мінабароны Украіны
Наткнуўшыся на зацяты супраціў расійскіх войскаў пры спробах прабіць абарончыя лініі пад Запарожжам і Данецкам у пачатку чэрвеня, украінскае камандаванне спыніла адпраўляць пяхоту і танкі для штурму расійскіх пазіцый. Замест гэтага Кіеў наносіць кропкавыя ўдары, спрабуючы аслабіць расійскую абарону для наступнай атакі.
А каб парушыць лініі забеспячэння расійскіх войскаў у глыбіні акупаванай тэрыторыі, украінцы выкарыстоўваюць дальнабойную заходнюю зброю. Але яны таксама спрабуюць разбурыць першыя лініі расійскай абароны ўздоўж фронту, выкарыстоўваючы больш таннае ўзбраенне для знішчэння расійскай артылерыі, складоў боепрыпасаў і ўстановак радыёэлектроннай барацьбы.
Яны таксама працягваюць пробныя атакі і адбілі на гэтым тыдні сяло Раўнопаль, хоць іншыя вылазкі мала што далі. Украінскія сілы яшчэ не падышлі да трох ліній абароны, пабудаваных расіянамі прыкладна за 10-20 км ад лініі баявога судакранання. Гэтыя лініі абароны ўключаюць супрацьтанкавыя равы, агнявыя пункты ды бетонныя ўмацаванні.
«Наступ ідзе няхутка, бо мы беражом людзей», — кажа 49-гадовы ўдзельнік каманды беспілотнікаў з пазыўным Буржуа. «Падрыхтоўка тэрыторыі займае нейкі час. Мы стараемся знішчыць як мага больш пунктаў абароны, перш чым пускаць войскі».
Каманда беспілотнікаў Clear Eyes правяла апошні месяц, зачышчаючы тэрыторыю ў некалькіх вёсках Запарожскай вобласці. Кіеў спадзяецца прарваць абарону Масквы якраз тут, каб перарэзаць сухапутны шлях, што злучае Расію з Крымам.
Калі ў пачатку гэтага месяца пачаўся наземны наступ, са слоў камандзіра групы беспілотнікаў Волкава, украінцы былі «трохі здзіўленыя» грунтоўнасцю расійскай абароны. Было падрыхтавана не менш за тры лініі абарончых рубяжоў. Акопы выкопвалі трактарамі і ўмацоўвалі бетонам. Былі падрыхтаваныя хованкі для танкаў і іншай тэхнікі. Пад'язныя шляхі падсыпалі жвірам, каб велікагрузныя машыны не захрасалі ў гразі падчас ліўняў.
«Усё нібыта проста, але калі ўсё гэта разам, атрымліваецца моцная сістэма абароны», — кажа Волкаў.
Узяўшы некалькі вёсак у гэтым раёне, Украіна прыпыніла маштабныя штурмавыя дзеянні.
З таго часу каманда Clear Eyes удзельнічае ў бесперапыннай гульні ў ката і мыш: аператары дронаў спрабуюць знайсці і ўразіць расійскую тэхніку, а расіяне спрабуюць збіць дроны.
Палонны расіянін, захоплены ў першыя дні контрнаступлення, намаляваў украінскім сілам карту размяшчэння войскаў у населеным пункце, за якім вядзецца назіранне. Але ўкраінцы не запытваюць агонь, пакуль дакладна не ідэнтыфікуюць цэль з дапамогай відэазапісаў з беспілотнікаў. Па словах украінскіх камандзіраў, боепрыпасы ў дэфіцыце.
Як адзначае Буржуа, за апошні час украінская артылерыя атакавала чатыры склады з расійскімі боепрыпасамі пасля таго, як іх заўважыў адзін з самых прасунутых дронаў — амерыканскі RQ-20 Puma, які выглядае як маленькі самалёт. Аднак на мінулым тыдні каманда страціла «Пуму», расіяне пасадзілі яе антыдронавым абсталяваннем.
Украінцы прасунуліся пад Бахмутам — Сырскі
Зяленскі: Калі контрнаступ будзе паспяховым, Расія прайграе вайну
