Актывіст Ілья Дабратвор: Я вырашыў вярнуцца ў Беларусь у наступны панядзелак. Васкрасенскі сказаў, што ўсё будзе добра
Грамадскі актывіст і ў мінулым супрацоўнік прарасійскага рэсурсу «Політрінг», які некалькі гадоў таму выехаў у Польшчу, распавёў «Народнай Волі» пра сваё рашэнне. Два месяцы таму ён канчаткова разышоўся з жонкай, з якой выхоўваў пяцярых дзяцей.
У Польшчу Ілья Дабратвор выехаў з палітычных прычын: ён баяўся палітычнага пераследу.
Зарабляў ён тым, што здымаўся ў масоўцы ў кіно, працаваў ахоўнікам на футбольных матчах і канцэртах, а таксама практычна кожны дзень таксаваў.
Стала таксама вядома, што Ілья развёўся з жонкай, з якой пражыў шмат гадоў і з якой выхоўваў пяцярых дзяцей.
Пасля гэтага актывіст напісаў у сацыяльных сетках, што «машына зламалася, і я дакладна ведаю, куды аддам апошнія 100 злотых — на білет да Мінска».
Праз нейкі час Ілья ўдакладніў сваю пазіцыю наконт вяртання ў Беларусь: «Я вырашыў вярнуцца. Дзякуй Юрыю Васкрасенскаму за такую магчымасць, пад яго гарантыі. У наступны панядзелак выязджаю…»
Гэты допіс Дабратвора выклікаў цэлую хвалю самых розных каментарыяў. Хтосьці палічыў, што гэтая інфармацыя — фэйк, нехта ўспрыняў яе ўсур’ёз.
«Народная Воля» звярнулася да самога Ільі Дабратвора, каб той праясніў сітуацыю наконт свайго вяртання.
— Я сапраўды вырашыў вярнуцца ў Беларусь, — коратка паведаміў суразмоўца. — Планую зрабіць гэта ў панядзелак, 24 ліпеня, хаця планы могуць змяніцца.
Тут шмат розных нюансаў, якія паўплывалі на гэтае рашэнне.
— Што з дзецьмі?
— Дзеці застаюцца ў Польшчы з маці, з якой тыдзень таму мы развяліся. А не жывём разам з Інай ужо два месяцы.
— Столькі гадоў разам пражылі, у вас пяцёра дзяцей…
— Так атрымалася, не хачу гэта нават каментаваць…
— Вы звярталіся ў камісію па разглядзе зваротаў грамадзян Рэспублікі Беларусь, якія знаходзяцца за мяжой?
— Не, я не падаваў туды заявы.
— Некаторых з тых, хто вяртаецца дадому, затым затрымліваюць і судзяць…
— Я гэтага не баюся.
— У сваім допісе ў сацыяльных сетках вы напісалі, што вяртаецеся ў Беларусь пад гарантыі Юрыя Васкрасенскага. Ён на самай справе даў вам нейкія гарантыі?
— Па тэлефоне Васкрасенскі сказаў, што ў мяне ўсё будзе добра.
— Чым вы плануеце заняцца ў Беларусі?
— Пакуль не ведаю. Спачатку трэба вярнуцца, а далей ужо нейкія планы складаць.
— Пад Мінскам у вас быў дом, у горадзе — кватэра. Што з імі цяпер?
— Наколькі вядома, яны знаходзяцца пад арыштам. Але я ўсё роўна вырашыў вярнуцца…
«Народная Воля» задала некалькі пытанняў і Юрыю Васкрасенскаму.
— Ці праўда, што вы давалі нейкія гарантыі бяспекі спадару Дабратвору, які жадае вярнуцца ў Беларусь? У вас на гэта ёсць нейкія афіцыйныя паўнамоцтвы?
— Ілья Дабратвор на самай справе звярнуўся да мяне па дапамогу. І, наколькі гэта ў маіх сілах, я аказваю садзейнічанне па вяртанні Ільі дадому.
Разам з тым хачу ўдакладніць, што рашаючае слова будзе за праваахоўнымі органамі. Калі ў іх не будзе ніякіх пытанняў да Дабратвора, то ён можа без перашкод вярнуцца.
— Адным словам, ніякіх гарантый вы не давалі?
— Найбліжэйшае пасяджэнне камісіі пройдзе 20 ліпеня, і, напэўна, да гэтага часу я даведаюся пазіцыю праваахоўнікаў у дачыненні да Дабратвора. Але, наколькі мне вядома, у масавых беспарадках удзелу ён не браў. А за тое, што недзе ўдзельнічаў, ужо панёс пакаранне.
Але Ілья сказаў, што і насамрэч хоча дадому, што яму няма жыцця на чужыне.
— А чаму ён не звяртаўся з заявай у камісію?
— Стандартны маршрут — гэта і насамрэч зварот у камісію, але мы з Дабратворам ведаем адзін аднаго гадоў дваццаць. Таму ён і папрасіў мяне вывучыць пытанне вяртання ў абыход фармальных працэдур. Але, паўтаруся, я пакуль не ведаю канчатковай пазіцыі сілавых структур…
Цяпер чытаюць
Міліцыя затрымала таго самага расійскага турыста, які кінуў недакурак на вуліцы. Заўтра суд16
Каментары