На беларуска-расійскай мяжы раптоўна скасавалі кантроль, які ўвялі ў маі. Пра гэта распавядаюць удзельнікі чатаў, якія сочаць за сітуацыяй на гэтым участку мяжы. З іх слоў, яшчэ ў панядзелак даводзілася праходзіць кантроль у прапускных пунктах, але з вечара аўторка тых, хто ўязджае ў Беларусь, ужо не правяралі, піша «Люстэрка».
Увечары 18 ліпеня ў чаце «Мяжа РФ — РБ» з'явіліся паведамленні аб тым, што з боку Беларусі зніклі памежныя пункты. Дакладны час, калі іх прыбралі, невядомы. Удзельнікі чата паведамляюць, што ў панядзелак, 17 ліпеня, яны былі, а ўжо ў аўторак увечары — зніклі.
— У панядзелак [17 ліпеня] раніцай усё было, — удакладняе адзін з удзельнікаў чата. — А ноччу ехаў са Смаленска, было абсалютна пуста.
Пра адсутнасць кантролю гавораць і тыя, хто перасякаў расійска-беларускую мяжу па трасе М-1 каля вёскі Красная Горка і вёскі Рудня (абедзве знаходзяцца ў Смаленскай вобласці Расіі).
Таксама няма дадатковага кантролю і каля аграгарадка Ляды (Дубровенскі раён) і каля вёскі Езярышча (Гарадоцкі раён).
— 18 ліпеня каля 21:00 пры руху з Масквы ў Мінск на легкавіку, Чырвоная Горка: толькі бегла прагледзелі пашпарты на расійскім баку, далей — нічога, — піша яшчэ адна ўдзельніца чата. — Ніякага надгляду, з машыны выходзіць не давялося. Усё як да майскіх, толькі даволі вялікая чарга з фур у правых палосах.
На гарачай лініі Дзяржпагранкамітэта распавялі, што кантроль сапраўды знялі: «Не магу вам сказаць, будзе ці не будзе. На сёння пакуль знялі. А заўтра, можа, паставяць».
Там дадалі, што далейшае развіццё сітуацыі залежыць ад распараджэння ўрада.
«Будзе распараджэнне — будзем неяк вырашаць, што нам рабіць. Мы не самі прымаем рашэнне. Ёсць у нас Лукашэнка, урад, і яны прымаюць рашэнне», — сказалі ў ДПК.
Кантроль прыбралі на ўсіх трасах.
Нагадаем, у пачатку мая Беларусь увяла свайго роду памежны кантроль на ўсіх уездах з Расіі. У ДПК тады казалі, што гэта часовая мера, звязаная з працэсам ратыфікацыі пагаднення аб узаемным прызнанні віз з Расіяй. А ў МЗС гэта называлі «не кантролем, а маніторынгам сітуацыі». Ужо ў першыя дні на мяжы пачалі збірацца чэргі. У канцы мая Расія ратыфікавала згаданае пагадненне, але кантроль застаўся.
Каментары