Прафесар Полацкага ўніверсітэта стварыў навуковую школу ў галіне плазменнай электронікі.
Доктар тэхнічных навук, прафесар у галіне навукі і тэхнікі, заслужаны навуковец і педагог Уладзімір Груздзеў памёр ва ўзросце 83 гадоў, паведамляе gorod214.
Уладзімір Груздзеў працаваў у Полацкім дзяржаўным універсітэце з 1993 да 2020 года. Ён кіраваў кафедрай фізікі, затым быў прафесарам кафедры, перадаваў свой вопыт маладым калегам.
«Уладзімір Аляксеевіч заўсёды быў душой калектыву, яго паважалі і шанавалі і калегі, і студэнты. Ён быў педагогам, які ўмеў ярка, вобразна і даходліва тлумачыць самыя складаныя фізічныя з'явы прыроды і прынцыпы працы тэхнічных прылад», — піша сайт ПДУ.
Акрамя педагогікі, жыццё Уладзіміра Груздзева была цесна звязана з навуковай дзейнасцю. З 1993 года пад яго кіраўніцтвам у Полацкім дзяржаўным універсітэце імя Еўфрасінні Полацкай актыўна развіваліся даследаванні карпускулярна-прамянёвых тэхналогій, фізікі плазмы і тэхналогій атрымання матэрыялаў з зададзенымі ўласцівасцямі.
У 2005 годзе пры кафедры фізікі была створана навукова-практычная лабараторыя «электроннай і іоннай тэхналагічнай апаратуры». Таксама на кафедры былі адкрыты магістратура і аспірантура па спецыяльнасці «Вакуумная і плазменная электроніка», рада па абароне дысертацый.
Вынікам навуковай і арганізатарскай дзейнасці Уладзіміра Груздзева стала стварэнне новага ў краіне навуковага напрамку і навуковай школы ў галіне плазменнай і эмісійнай электронікі. У рамках работы школы апублікавана больш за сто навуковых прац, атрыманы шматлікія патэнты. Па тэматыцы даследаванняў навуковай групы абаронены 7 магістарскіх, 4 кандыдацкія і адна доктарская дысертацыі.
За працоўную дзейнасць Уладзімір Груздзеў адзначаўся рэспубліканскімі ўзнагародамі, быў выдатнікам адукацыі Рэспублікі Беларусь, пераможцам спецыяльнай прэміі Полацкага дзяржаўнага ўніверсітэта «Крыніца ведаў» у намінацыі «гонар і слава».
Цяпер чытаюць
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка2
Каментары