Украінскія войскі зайшлі ў Казачыя Лагеры на левым беразе Дняпра — расійскія ваенкары
У сённяшніх допісах ваенкараў шмат панікі: украінскі дэсант змог зайсці ў частку населенага пункта насупраць Херсона. Кантроль над Казачымі Лагерамі стварыў бы магчымасць для навядзення пераправы цераз Дняпро.
Аб поспеху ўкраінскіх войскаў першым напісаў расійскі блогер Трынаццаты, які ваюе ў Херсонскай вобласці.
«На фоне навін аб зняцці з Херсонскага кірунку баяздольных падраздзяленняў ПДВ (дэсантных войскаў, самых баяздольных адзінак расійскай арміі. — «НН») і пераводзе іх на Запарожскі кірунак, я хацеў бы сёе-тое заўважыць. Праціўнік паспяхова замацаваўся на нашым беразе Дняпра, заняў населены пункт Казачыя Лагеры і нават ужо прарваў першую лінію нашай абароны, якая ў большасці складаецца з мабілізаваных, а таксама прасунуўся на 800 метраў. Гэта вельмі х..вая тэндэнцыя. Калі яны навядуць пераправу і змогуць рабочую арганізаваць пераправу, то гэта будзе, мякка кажучы, хранова», — напісаў блогер Трынаццаты.
Ваенкараўскі тэлеграм-канал «Два маёры» заяўляе пра наяўнасць у шэрагах украінскай штурмавой групы «наёмнікаў». Гэта звычайны прыём расійскіх прапагандыстаў кожны раз, калі на фронце адбываюцца няўдачы.
«Праціўнік раніцай высадзіў да сямі лодак дэсанта. Чулася ў перахопах гаворка польскіх і грузінскіх наймітаў, — піша «Два маёры». — Каб не дапусціць флангавага руху ворага па нашых акопах, падраздзяленні УС Расіі адышлі на захад ад Казачых Лагераў». І дадае: «Сітуацыя кантраляваная. Спачатку сыгралі сваю ролю недастатковая навучанасць і пільнасць войскаў, сувязь і разуменне сваёй задачы на пярэднім краі абароны».
Украінскія войскі перайшлі ад абароны да наступу прыкладна ў маі. Прасоўванне ідзе павольна, бо расійскія войскі абсалютна дамінуюць у паветры і ўстанавілі значныя мінныя загароды.
Найбольш украінскія войскі прасунуліся пад Бахмутам, які яны спрабуюць узяць у клешчы, а таксама ў раёне Урэмеўскага выступу. Але і там, і там прасоўванне на 5—7 кіламетраў заняло больш за два месяцы.
На левым беразе Дняпра насупраць Херсона раней украінскія войскі кантралявалі толькі незаселеныя астравы і дачныя пасёлкі ў нізкіх месцах. Кантроль над вялікім сялом Казачыя Лагеры, размешчаным на грудку, дазволіў бы ўкраінцам навесці такую пераправу, па якой стала б магчымым перакідванне цяжкага ўзбраення. Плацдарм на левым беразе Дняпра стварыў бы пагрозу з фланга асноўнай групоўцы расійскіх войскаў пад Запарожжам.
У Казачых Лагерах да вайны жыло каля 3700 чалавек.
Цяпер чытаюць
У Францыі ад спёкі загінуў дальнабойшчык з Докшыцаў2
Каментары