«Жартаў не будзе». Прэм'ер Латвіі назваў мабілізацыю дадатковых сіл на беларускую мяжу папераджальнай акцыяй
Штогадовы адпачынак служачым Дзяржаўнай памежнай аховы спыняецца, а афіцэры, якія знаходзяцца ў адпачынку, адклікаюцца з яго.
Мабілізацыя дадатковых сіл на латвійска-беларускай мяжы — гэта папераджальная акцыя і сігнал, што «жартаў не будзе», сказаў прэм'ер-міністр Крыш'яніс Карыньш у інтэрв'ю праграме «Ранішняя панарама», піша Delfi.lv.
Беручы пад увагу гібрыдную пагрозу, якая імкліва расце на латвійска-беларускай мяжы, Дзяржаўная памежная служба з аўторка мабілізуе дадатковых дзяжурных памежнікаў для ўзмацнення аховы дзяржаўнай мяжы.
Гэта праактыўная акцыя, якая павялічвае нашу прысутнасць і пасылае выразны сігнал нашаму грамадству і ўладам Беларусі, што «тут не будзе жартаў» і знешняя мяжа як Латвіі, так і ЕС будзе ахоўвацца, — сказаў Карыньш, дадаўшы, што ціск з боку Беларусі паступова ўзмацняецца.
Як паведамлялася, рашэнне аб мабілізацыі дадатковых сіл было прынята ў сувязі з ростам гібрыднай пагрозы на латвійска-беларускай мяжы ў панядзелак, 15 жніўня, калі былі выяўлены спробы незаконнага перасякання нацыянальнай мяжы 96 людзьмі, а таксама зафіксавана ўзмацненне ўмяшання беларускіх улад у арганізацыю патоку нелегалаў.
Штогадовы адпачынак служачым Дзяржаўнай памежнай аховы спыняецца, а афіцэры, якія знаходзяцца ў такім адпачынку, адклікаюцца з яго.
Дзяржаўная памежная служба таксама запытала дадатковую падтрымку ў Нацыянальных узброеных сіл (НУС) і Дзяржаўнай паліцыі.
У Міністэрстве абароны Латвіі паведамілі, што кіраўнік ведамства абароны Інара Мурніецэ даручыла НУС накіраваць дадатковыя сілы для падтрымкі Дзяржаўнай памежнай аховы на латвійска-беларускай мяжы.
З 5 верасня па 2 кастрычніка па ўсёй Латвіі пройдуць комплексныя вучэнні па нацыянальнай абароне Namejs-2023, у якіх плануецца задзейнічаць больш за 8500 латвійскіх вайскоўцаў і зэмэсаргаў (байцы Нацыянальнай гвардыі), а таксама салдат сіл саюзнікаў.
У рамках падрыхтоўкі да Namejs-2023 з 19 па 20 жніўня на тэрыторыі памежных Рэзэкненскага і Лудзенскага раёнаў пройдуць палявыя тактычныя вучэнні 32-га пяхотнага батальёна 3-й Латгальскай брыгады Зэмэсардзэ з мэтай навучання і праверкі агульных баявых магчымасцяў падраздзялення.
Сёлета было прадухілена незаконнае перасяканне мяжы паміж Латвіяй і Беларуссю 5799 нелегаламі, з гуманітарных меркаванняў у краіну ўпусцілі 292 чалавекі.
Каментары