«Усё ўпіралася ў бюракратыю». Беларускі добраахвотнік расказаў, як выйграў суд у Міграцыйнай службы Украіны

Калі Іван Тамашэвіч звольніўся з войска, то пачаў спробы атрымаць ва Украіне статус уцекача, піша «Радыё Свабода».

«Пасля звальнення з ІІ Інтэрнацыянальнага легіёна ў мяне з'явілася разуменне, што служыць мне больш няма дзе. Праз кіраўнікоў палка Каліноўскага я трапіў у чорныя спісы ГУР і не магу трапіць нават у тыя падраздзяленні, якія не звязаныя з палком», — расказвае Іван.

Ён кажа, што ні жадання, ні магчымасцяў з'язджаць з Украіны ў яго не было, таму Іван вырашыў легалізавацца ў краіне і падацца на статус уцекача.

«Тым больш што мой тэлеграм-канал «Менавіта War» быў прызнаны ў Беларусі «экстрэмісцкімі матэрыяламі». Дадалася таксама служба ва ўкраінскім войску, праз якую ў Беларусі мяне будзе чакаць крымінальны пераслед», — расказвае Тамашэвіч.

Але атрымаць даведку з вайсковай часці, дзе служыў добраахвотнік, аказалася няпроста.

«Усё ўпіралася ў бюракратыю. Я напісаў рапарт аб звальненні яшчэ 21 чэрвеня, 23 чэрвеня быў звольнены, а дакументы змог атрымаць толькі 6 ліпеня».

Акурат праз гэта і ўзнікла замінка з падачай дакументаў.

«11 ліпеня я трапіў да ўкраінскай праваабарончай арганізацыі «Право на захист», якая мае сувязі з Агенцтвам ААН у справах уцекачоў (УВКБ ААН). Праз іх я атрымаў ліст абароны ад УВКБ ААН (копія ёсць у рэдакцыі. — РС), што давала пэўныя прэферэнцыі. «Право на захист» таксама дапамагала мне з падрыхтоўкай дакументаў для падачы ў Дзяржаўную міграцыйную службу Украіны (ДМС). Атрымаўся дастаткова тоўсты пакет, з якім я 14 ліпеня паехаў у кіеўскую ДМС».

Першапачаткова Івану Тамашэвічу адмовілі ў прыняцці дакументаў, але далі магчымасць падацца па пошце. Пры гэтым не было гарантыі, што такім чынам дакументы дойдуць да адрасата.

«Пасля некаторых маіх тэлефонных размоў і праваабаронцаў з ДМС мне паставілі ўмову, што дакументы яны возьмуць, але на мяне мусяць скласці адміністрацыйны пратакол аб перавышэнні тэрміну знаходжання на тэрыторыі Украіны. Для мяне гэта было чакана. Я мусіў заплаціць штраф у памеры 3400 грыўняў (каля 93 даляраў). У мяне было 10 дзён, каб абскардзіць гэтае рашэнне. У гэтым мне зноў дапамагалі юрысты арганізацыі «Право на захист», — расказвае ён.

У выніку дакументы ў міграцыйнай службе ў Івана прынялі ў жніўні.

«Мне выдалі даведку, што я падаўся на атрыманне статусу асобы, якая патрабуе абароны ва Украіне. Гэтая даведка дазваляе мне легальна знаходзіцца на тэрыторыі Украіны».

Пасля гэтага Іван разам з праваабаронцамі пачаў абскарджваць рашэнне ДМС.

«Я прывёў довады, чаму не змог у вызначаны тэрмін высветліць свой статус ва Украіне, усё гэта было выкладзена ў лісце. Скарга была накіраваная ў суд электроннай поштай. Праз нейкі час мне прыйшоў вялікі ліст, што справа была разгледжаная і мая скарга была задаволеная. Пастанова ДМС, такім чынам, адмяняецца».

Наконт статусу ўцекача Іван Тамашэвіч пакуль не мае адказу. Кажа, што ягоная знаёмая блогерка Алена Васільева чакала адказу цэлы год. Цяпер жа, падчас вайны, мяркуе «Менавіта», ахвотных атрымаць статус менш, і тэрміны павінны скараціцца. Са слоў «Менавіта», вядома, што ніхто з беларускіх ваяроў пакуль не атрымліваў ва Украіне статусу ўцекача, толькі дазвол на жыхарства.

Сам Іван Тамашэвіч на гэты момант разам з Аленай Васільевай займаецца дабрачыннай дзейнасцю ў рамках арганізацыі «Беларускі Майдан UA».

«У мяне былі пэўныя сувязі, атрымалася нешта перадаць для ўкраінскіх вайскоўцаў. Маю падзякі за дапамогу. Людзі праз нашы сацсеткі могуць адсочваць, куды ідзе іхняя дапамога, бачаць, што ніякага прыбытку мы з гэтага не маем. Нядаўна прыходзіла дапамога ад нямецкай арганізацыі, там прыйшлі медычныя апараты, шматфункцыянальны ложак, агулам 3,5 тоны грузу».

Іван Тамашэвіч удзельнічаў у аперацыі па ўтрыманні станцыі Калініндорф у Херсонскай вобласці, браў удзел у штурме сяла Лазавое, удзельнічаў у баях пад Севераданецкам і Гуляйполем. Апошнім часам разам з ІІ Інтэрнацыянальным легіёнам знаходзіўся ў Харкаўскай вобласці, недалёка ад мяжы з Расіяй.

• 9
• 0
• 2
• 1
• 0
• 1
• 2
• 0