Меліціна Станюта святкуе 30-годдзе. У прыхільнікаў яна папрасіла нечаканыя падарункі
Гімнастка Меліціна Станюта, якой сёння споўнілася 30 год, апошнім часам жыве ў Парыжы. Са спартоваю ўпартасцю і выбітным аптымізмам яна змагаецца з французскімі бюракратычнымі барʼерамі і побытавымі цяжкасцямі.
Учора яна распавяла сваім прыхільнікам радасную навіну — пасля месяцаў пошукаў кватэры, яна нарэшце здолела яе зняць пад Парыжам. У Францыі, каб зняць жытло, тлумачыць Меліціна, трэба прайсці праз бюракратычнае пекла з розных паперак.
«Заўтра мой дзень нараджэння… Я прачнулася ў ложку без коўдры ды падушак, у халоднай кватэры без мэблі ды нават кубачкаў, не кажучы пра патэльню ды імбрык, але з думкай, што я шчаслівая, бо нарэшце маю свой новы дом на некалькі месяцаў, і адначасова сумуючы па сваёй кватэры ў Менску, дзе ёсць усё, нават болей… Але гэта мой кут у краіне, далёкай ад роднага краю», — напісала Меліціна.
Яна дадае, што тры гады таму не падумала, што на свае 30 год будзе марыць не пра дзявочы падарунак (пра якую торбачку ці сукенку), а пра падушкі, патэльню ды пыласос.
«Жыццё чалавека (чытай, беларуса) — цікавая штука», — дадае дзяўчына.
У сторыс Меліціна просіць прыхільнікаў, якія хочуць павіншаваць яе, дарыць ёй хатнія рэчы.
Цяпер чытаюць
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх2121
Каментары